Migadra roa taona an-tranomaizina ny ben’ny Tananan’Ambohibao teo aloha, Lalaina Valisoa. Nalefa eny Antanimora i Rafanomezantsoa Jean Nirina (Hafari). Eny Imerintsiatosika kosa Raholdina Naivo. Olana momba ny tany avokoa no iampangana azy ireo.
Namoaka ny didy ny mpitsara avy eo anivon’ny fitsarana miady amin’ny kolikoly na Pac ka nanasazy roa taona, sazy mihatra, ny ben’ny Tanàna teo aloha an’ Antehiroka, distrikan’Ambohidratrimo, miampy lamandy 10 tapitrisa Ar. Nivarotra tanin’olona tamin’ny fomba tsy ara-dalàna io ben’ny Tanàna teo aloha, fantatry ny maro amin’ny solon’ anarana hoe «Lalaina Vatosoa» io, araka ny vesatra hiampangana azy. Tany tsy lavitry ny ivontoeran’ ny Sampandraharaha miady amin’ny kolikoly na Bianco ao Ambohibao io nahodinkodiny io, araka ny loharanom-baovao. Ankoatra io, vesatra hiampangana azy koa ny fanararaotam-pahefana sy ny fampiasana izany tsy araka ny tokony ho izy. Nahazoana tombontsoa manokana anefa io fananararaotam-pahefana nataony io. Niroso nanao ny asany ny sampandraharaha miady amin’ny kolikoly sy nisambotra an’io olom-boafidy teo aloha io. Tsiahivina, notanana vonjimaika any am-ponja koa ny solombavambahoaka Naivo Raholdina sy ny sefo fokontany Anosizato Atsinanana teo aloha, Jean Nirina Rafanomezantsoa, afakomaly. Voasaringotra amin’ny famarotana tanim-panjakana ity farany ka nalefa any am-ponja taorian’ny fakana am-bavany azy teny anivon’ny zandary.
Ady tany teny By-Pass
Ankoatra izay, afaka madiodio i Roberto, vadin’ny mpanakanto Stephanie, taorian’ny didy navoakan’ny fitsarana tetsy Anosy, omaly. Nambaran’ny mpitsara mpamoaka didy fa ity lehilahy ity no tena niharan’ny fisolokiana fa tsy nisoloky. Manoloana izany, hampiakatra ny raharaha eny anivon’ny tendrom-pitsarana miady amin’ny kolikoly ny mpitory, tsy afapo tamin’ny didy. Vonona ny hitondra ny porofo rehetra eny anivon’ny fitsarana mahakasika ny fisian’ny kolikoly nataon’io lehilahy io izy ireo. Marihina fa varotra tany mirefy 1100 m² izay mitentina 66 tapitrisa Ariary teny By-Pass ny anton’izao disasida teo amin’ny roa tonta izao. Andrasana ny tohin’ny raharaha.
Tsiferana R./ Mino
French