Eid Al Adha : Nahatsiaro ny soron’i Abrahama ny Ahmadiyya

Notanterahina teny amin’ny moske foiben-toeran’ny fikambanan’ny miozolomanina Ahmadiyya de Madagascar, eny Andavamamba Anati­ha­zo, omaly, ny fetin’ny fakan-tahaka “Eid Al Adha”. Sorona nataon’i Abrahama, araka ny voalazan’ny Soratra Masina hita ao amin’ny Coran. Araka ny fanazavan’ny misionera Ahmed Mujeeb, isan-taona ny fahatsiarovana ny fetin’ny fakan-tahaka ny nataon’i Abra­hama izay nanaiky hanao sorona ny zanany noho ny fankatoavany an’Andriama­nitra. Nosoloin’Andriamanitra ondry anefa izany satria tsapan’Andriamanitra ny fitiavan’i Abrahama ny zanany izay nekeny hatao soro­na. Niainga avy amin’io finoan’i Abrahama io no notsarovana omaly tamin’ny fanaovana sorona biby (famonoana omby miisa 50), osy 200 isa kosa rahampitso, mba hankalazana ny fakan-tahaka tsara ny nataon’i Abrahama. Nozaraina ho an’ny mpiara-belona ny hena ary efa fanaon’ny Ahma­diyya maneran-tany ny fanamarihana toy izao, noho ity fankatoavan’i Abrahama an’­ An­driamanitra ity. Nomari­hin’ny misionera mpitarika ny Ahmadiyya hatrany fa taorian’ ny fivahinianana masina na­taon’ny mpino silamo rehetra maneran-tany tany La Mec­que, manao izao fahatsiarovana izao izy ireo mandritra ny telo andro. Fitiavana, tsy fankahalana, miasa manerana izao tontolo izao, fifankatiavana, fihavanana, manampy ny olona sahirana sy ny mahantra ary manameloka hatrany ny herisetra sy ny fampihorohoroana, ny foto-kevitra napetraky ny Ahmadiyya hatramin’izay.

Jean Claude