Noraisin’ny minisitry ny Asa vaventy (MTP), Rafefimanana Sambilason Richard, ny 1 jona teo, ny delegasionin’ ny Vondrona eoropeana (UE), notarihin’i Roland Kobia. Noresahina ny sehatry ny lalana rehetra tohanan’ity vondrona iraisam-pirenena ity. Anisan’izany ny fandrafetana ny Tahirimbola ho an’ny lalana (Fond routier), ny fampiasana ny vola ho an’ny fikojakojana ny lalana. Noresahina ihany koa ireo asa efa mandeha tohanan’ny UE, toy ny fanarenana ny lalam-pirenena faha-6 (Ambanja-Antsiranana), ny RN12A, ny RN13 (Ambovombe-Taolagnaro), Anisan’ny nifampidinihana ny fanatanterahana ny tetikasa “Fly Over”, eny Anosizato sy Ampasika, hamahana ny olan’ny fitohanan’ny fifamoivoizana amin’ireo faritra ireo. Eo koa ny fanarenana ny tetezana Ifasy sy Mahavavy (RN6) izay samy simban’ ny rivodoza nifanesy teto amintsika. Noresahina koa ny fanohizana ny fanarenana ny RN9 (Bevoay-Manja).
Harahi-maso ny vesatry ny fiara
Tafiditra tao anatin’ity dinika ity koa ny fiarovana maharitra ny lalana. Hisy ny fanentanana
ireo mpampiasa lalana, toy ny mpitatitra sy ny fiarabe. Satria, ny vesatra tafahoatra entin’ny fiara no anisan’ny tena manafaingana ny fahasimban’ny lalana, raha tsy hitanisa afa-tsy ny eny amin’ ny RN2. Midika izany fa haverina ny fampandehanana ny Ivontoerana fandanjana ny vesatry ny fiarabe isaky ny lalam-pirenena. Farany, hatomboka ny fandaharanasa nasionaly ho an’ny fitaterana eto Madagasikara.
Njaka A.
French