Nolerana zava-maranitra, norasaina antsy teo amin’ny tendany, ny ankizivavy iray vao 15 taona, tao amin’ny kaominina Fihaonana, afakomaly. Nosamborina ny sakaizany sy ny roa lahy hafa.
Niniana novonoina sy nanaovana filan-dratsy ahina ho naolana, hita faty, ny ankizivavy iray 15 taona, tao amin’ny fokontany Andranovelona, kaominina Fihaonana, distrikan’Ankazobe, afakomaly. Niala tao amin’ ny trano fonenany izy, ny alatsinainy 1 jona, tamin’ny 12 ora atoandro. Tsy niverina nody intsony. Nampiahiahy ny fianakaviany ny tranga ka nametraka fitarainana teny anivon’ny manam-pahefana izy ireo taorian’ny tsy fodian’ilay zaza, nandritra ny alina. Nametraka ny ahiahiny tamin’ny sakaizan’ny zanany avy hatrany ny ray aman-drenin’ilay ankizivavy. Niditra an-tsehatra nanao ny famotorana ny zandary ka nosamborina ilay lehilahy. Natao famotorana izy ka nitoroka ny toerana nisy ny vatana mangatsiakan’ilay ankizivavy. Nahitana ratra ny vatan’ity farany sady norasana antsy teo amin’ny tendany. Nanaovan’ny nahavanon-doza ny filan-dratsiny koa ny lasibatra, araka ny fizahana nataon’ny mpitsabo.
Telo lahy
Nandritra ny fotoana nanaovan’ny tomponandraikitra ny famotorana, nitoroka roa lahy hafa ilay sakaizan’ilay ankizivavy hita faty. Voasaringotra tamin’io tranga vonoan’olona io ireo roa ka niditra an-tsehatra tamin’ny fisamborana azy ny tomponandraikitra. Samy tanora vao erotrerony avokoa ireo telo lahy notanana vonjimaika. 22 taona ilay sakaizan’ilay ankizivavy raha toa ka samy 18 taona ireo roa lahy hafa voatonona anarana. Tetsy ankilany, saron’ny mpitandro filaminana tsy lavitry ny toerana nahitana ny nofo mangatsiakan’ilay niharam-boina ny antsy nampiasain’ireo tsy valahara. Andrasana ny tohin’ny raharaha.
Tsiferana R.
French