Lehilahy iray tokony ho 38 taona namono tena, nitsoraka tao ambany fiara mpitatitr’ olona zotra 009, marika Mercedes, afakomaly hariva, tokony ho tamin’ny 6 ora hariva. Niseho tetsy Ampefiloha, akaikin’ny lalamby mihazo an’Andavamamba, ny loza. Voahitsaky ny kodiarana aorian’ilay fiara ny lohany ka vaky, niparitaka tamin’ny arabe ny ra. Niezaka namonjy ity farany tany amin’ny hopitaly HJRA Ampefiloha ny mpamilin’ilay fiara, saingy tsy tana teny an-dalana ny ainy.
Nandeha an-tongotra avy any amin’ny sisin-dalana ankavanan’ny fiara ity lehilahy namono tena ity, raha ny fanazavana voaray avy amin’ny olona nanatri-maso teny an-toerana. Nitsoraka tampoka tao ambanin’ilay fiara izy vantany vao nandalo teo akaikiny. Avy any Ampefiloha hihazo an’Andavamamba ilay fiara nitera-doza. Tsy tafala io namono tena io ny mpamily na dia niezaka ihany aza, hoy hatrany ny loharanom-baovao. Somary nisy fitohanana madinika ny lalana nandritra ny loza. Tonga teny ifotony nijery ny zava-misy sy nanao fanadihadiana ny polisy avy amin’ny CSP 4. Efa nentina eny amin’ny tranom-patin’ny HJRA ny razana. Marihina fa mpanadio tanàna ary monina ao amin’ny fokontany Manarintsoa Centre, ity lehilahy maty voahitsaky ny fiara ity. Efa nentina nanaovana fanadihadiana eny amin’ny biraon’ ny polisy kosa ilay mpamily, izay 29 taona, taorian’ny tranga.
Mino
French