Olana tampoka teo amin’ny hisatra, nitarika loza ka namoizan’aina olona efatra, tao Ambalavaokely, PK419+100, afakomaly.
Tsy tana ny ain’ny efatra tamin’ireo mpandeha tra-doza tao anatin’ny fiara nivadika teny amin’ny lalam-pirenena fahafito, PK419+100, tao amin’ny tetezan’Ambalavaokely, distrikan’i Vohibato, afakomaly. «Tsy nahazo tampoka ny hisatra tamin’ilay fiara. Anisan’ny nitarika ny loza», hoy ny fanazavan’ny kaomandin’ ny vondron-tobim-paritra eo anivon’ny zandarimaria miasa ao Fianarantsoa, omaly. Niharan-doza tampoka ity fiara nitondra mpandeha miisa 38 ity rehefa avy namonjy fotoam-pivavahana teo anivon’ny Toby Lehibe Manolotrony, ny alin’ny alahady 16 aogositra, tamin’ny 10 ora alina. Nivoaka ny lalana ny fiara ka nivadika. «Handeha hamonjy fodiana any Isandra ireo olona tra-doza ireo», hoy ny fanampim-panazavana. Mafy ny dona nihatra tamin’ny mpandeha sasantsasany ka nitarika fahavoazana. Nezahin’ireo nanatri-maso nentina teny amin’ny toeram-pitsaboana ireo tena voa mafy. Namoy ny ainy anefa ny efatra noho ny ratra sy fahavarezan-drà be loatra nahazo azy ireo. Manaraka fitsaboana eo anivon’ny hopitaly Tambohobe Fianarantsoa ireo naratra izay marihina fa tsy misy ahina ny ainy.
Maty tampoka
Renim-pianakaviana avy nanao tafika masina nitambotsotra tampoka tao anaty taksiborosy teo Andranomanelatra, RN7, PK147, omaly. Hitodi-doha hamonjy ny fianakaviany, taitra tampoka vokatry ny fahafatesan’ny mpiara-mivavaka aminy, ilay ramatoa. Tsy niverina koa anefa ny ain’ity farany. Nijanona ny fiara nitondra azy ary niroso tamin’ny fikarakarana ny nofo mangatsiakan’io namoy ny ainy io ny tomponandraikitra. Ankoatr’io, mpamily kamiao nosokirina tao anatin’ny fiara nentiny teny amin’ny RN2, omaly. Nivadika ny fiara ka nibahana ny arabe. Nitohana nandritra ny ora maro ny fifamoivoizana. Raha tsiahivina, matetika hitrangana lozam-pifamoivoizana ny ankamaroan’ireo lalam-pirenana tato ho ato. Ilaina hatrany ny fitandreman’ ny mpamily sy ireo mpampiasa lalana rehetra hisorohana ny loza.
Tsiferana R.
French