Minisitry ny Varotra: “Miainga avy eny ifotony ny fampandrosoana”

Fanatsarana ny lalana. Nivoitra izany nandritra ny dinika niarahan’ny minisitry ny Varotra sy ny Fanjifana, Andrima­dison Haingotiana, tamin’ireo ben’ny Tanàna ao amin’ny Faritra Vakinankaratra, tao Antanimasaka, ny sabotsy teo. Tafiditra ao anatin’izany ireo kaominina 19, ao amin’ny distrikan’­ Ambatolampy. Samy nilaza ny hetahetany avy ireo ben’ ny Tanàna, saingy niraisan’ny rehetra ny fangatahany ny
lalana.”Manome toky aho fa hanao tatitra sy hamaly momba ireo lafin-javatra navoitran’ny ben’ny Tanàna amin’ny tomponandraikitra tandrify”, hoy ny minisitra. Ankilany, nanolotra fitaovam-pianarana ho an’ny mpianatra 118 afa-panadinana CEPE sy BEPC ny minisitra. Eo koa ny vary 30 taonina, vatsy ho an’ireo raiamandreny zokiolona, hanatanterahana asa tanamaro any amin’ny kaominina Antanimasaka Amba­tolampy izay ho tonga amin’ny herinandro. Nandrisika ireo mpianatra hilofo hatrany amin’ny fianarana ity tomponan­draiki-panjakana ity. Ankoatra izay, nidina nisafo ireo toeram-pivarotana tao amin’ny tsenan’Antanimasaka ihany koa ny minisitra. Nanome toromarika ireo mpivarotra hitandro ny fahadiovan­’ireo entana amidy ny tenany. Nasongadiny manokana ireo fitaovana ampiasaina amin’ny fikarakarana sakafo. Nentanina koa izy ireo hitondra ny fitaovam-pandanjana ho tsaraina.

Henintsoa