Tratry ny vela-pandrika nataon’ny zandary tao Ambatondrazaka ireo naka an-keriny zazavavy varira 3 taona tany Vavatenina tamin’ny 5 septembra. Nokasain’ireo mpaka an-keriny hamidy izy. Misy fianakavian’ny renin’ilay zaza tamin’ireo olona dimy tompon’antoka tamin’ilay asa ratsy. Vehivavy ny telo ary lehilahy ny roa tamin’ireo voasaringotra. Namonjy alim-bavaka ny renin’ilay lasibatra. «Navelan’ny reniny irery tao an-trano io zanany vavy io. Nanao mora ny nidiran’ireo olon-dratsy tao an-trano naka ilay zaza», hoy ny fanazavan’ny zandary kaomandin’ny vondron-tobim-pileovana Alaotra Mangoro, omaly. Notazomin’ny manam-pahefana miasa ao Vavatenina ny renim-pianakaviana namantarana ny tena zava-nisy marina momba ity fahaverezan-janany vavy ity. « Ny tomponandraikitry ny fokontany no nampandre ny mpitandro filaminana momba io tranga io », hoy ny fanampim-panazavana.
Nentina nandositra
Voasakan’ny mpitandro filaminana tao Ambatondrazaka ireo olona nikasa hivarotra ilay zaza. Olona roa hafa niray tsikombakomba tamin’ireo nitondra azy voasambotra tao Sahatavy, faritra Analanjirofo. Tafakatra dimy ireo voarohirohy ho niray tendro tamin’ny fakana an-keriny ilay zaza. Misahana ny fanadihadiana ny mpitandro filaminana miasa ao Vavatenina izay tanàna fonenan’ny ray aman-drenin’ny zaza lasibatra. Natolotra ireto farany ilay zazavavy. Andrasana ny fivoaran’ny fanadihadiana momba ity tranga ity.
Tsiferana R.
French