Taorian’ny vokatra tsara azon’ny Barea zandriny, afakomaly, nahita faharesena iray sy fandresena iray indray izy ireo, omaly, tamin’ny andro fahatelo, fifanintsanana maneran-tany baolina kitra, tontosaina any Azerbaidjan. Laharana faharoa izy ireo.
“Resy, avy eo nandresy”! Nahita fahombiazana ny ekipam-pirenena Barean’i Madagasikara zandriny, omaly, tamin’ny fiadiana ny amboara maneran-tany “Fifa World Cup Festival U15”, tontosaina any Azerbaïdjan. Resin’ny Venezuela tamin’ny isa 1 no ho 0, avy eo nanarina izany lesoka izany ka nandresy an’i Somalie, 2 no ho 1. Lasa laharana faharoa izany ny Malagasy, raha toa ka voalohany afakomaly. Somary sahirana kely ny Malagasy mpilalao tamin’ny fifanandrinana voalohany. Tsara marihina fa nitarika 1 no ho 0 ry zareo somalianina. Nanenjika ny Malagasy ary nahita fandresena. Mbola nisongadina tamin’ireo lalao roa ireo i Francisco na i Dembele kely, izay nahasahala ny isa tamin’i Somalie. Tsara ny mampahatsiahy fa tao anatin’ny lalao dimy vitan’ izy ireo, nahazo fandresena efatra sy faharesena iray ny Barea zandriny. Mbola tsara ihany koa ny vokatra azon-dry zareo, ny faran’ny herinandro teo. Nandavo an’i Mozambika, 2 no ho 0, nandresy an’i Nouvelle Zelande sy i Porto Rico, tamin’ny isa 4 no ho 3 avy. Mitana ny laharana faharoa ao amin’ny vondrona “T” ny Barea zandriny. Raha tsy misy ny fiovana, tafiditra anatin’ny sokajy “B” ireo firenena faharoa rehetra isam-bondrona, ka izay be isa amin’izany no voahosotra ho tompondaka maneran-tany amin’ny « Fifa World Cup Festival U15 », andiany voalohany, ho an’ny vondrona “B”. Ireo firenena voalohany kosa, miaraka amin’ireo efa sangany, anisan’izany i Brésil, France, Espagne,…. Hifarana ny zoma ho avy izao ity fifaninanana maneran-tany ity.
Fitia Randria
French