Nifarana omaly ny fitsidihana ofisialy nataon’ny delegasiona malagasy an’i Bologne Italia. Maro ny dinika natao ka anisan’izany ny kolontsaina sy ny sarimihetsika.
Teboka lehibe notsongaina nandritra ny fihaonana tany Italia ny fanamafisana ny fiaraha-miasan’i Madagasikara sy i Italia, ho fampiroboroboana ny kolontsaina sy ny sarimihetsika. Nitarika ny iraka natao tany an-toerana ny minisitry ny Serasera sy ny kolontsaina, izay nanamafy ny vina ho fampifandraisana ny fiarovana ny vakoka amin’ny fanabeazana, ny famoronana ary ny fampandrosoana ny sinema. Omeny lanja amin’izany ny fifampiresahana amin’ny matihanina, ny fanamafisana ny fahaiza-manao eto an-toerana ary ny fananganana fiaraha-miasa misy tanjona sy dingana mazava. Tanjona amin’ izany ny hahazoan’ny vahoaka tombontsoa mivaingana.
Nifantoka tamin’ny fitahirizana, ny famadihana ho niomerika, ny fanarenana ny horonantsary, ny fampitaovana ary ny fanofanana ireo Malagasy matihanina ny fifanakalozana tamin’ny Cineteca Di Bologna sy ny laboratoara «L’Immagine Ritrovata», izay nanome ny fanasana ho an’i Madagasikara, tamin’ity fitsidihana ity. Anisan’ny tanjona koa ny hanamafy fiaraha-miasa maharitra ho fiarovana ny vakoka ara-tsarimihetsika sy ny tahirin-tsary ary feo malagasy.
Mifamatotra amin’ ny tetikasa fiarovana sy fanomezana lanja indray ny tahiry ao amin’ny Auditorium Androhibe izany. Noresahina ihany koa ny hametrahana fifanarahana fiaraha-mamokatra sarimihetsika na «Accord de coproduction» hampiroboroboana ny famokarana sy hanamafisana ny fiaraha-miasa eo amin’i Madagasikara sy Italia.
Mi.Raz
French