Rotiky ny balan’ny zandary ireo dahalo roa lahy anisan’ny ikoizana amin’ny halatra omby tao Etrotroka, distrikan’i Farafangana, ny 24 desambra teo. Taorian’ny nahalasibatra matetika ny ombin’i Aban’i Mirihina, manana omby maro ao Mahatama anatin’ny fokontany Tanambao. Araka ny angom-baovao azon’ny zandary, tompon’antoka tamin’ny fangalarana ireo omby ireo ny dahalo roa lahy. Nanao vela-pandrika hisamborana ireo olon-dratsy ireo, araka izany, ny mpitandro filaminana. Nidina tany amin’ny toerana hitobian’ireo dahalo ireo ny zandary enina mirahalaly niaraka tamin’ny fokonolona nanoro lalana, ny alin’ny 24 desambra teo. Tamin’ny 02 ora maraina, nigadona teo amin’ny ala fieren’ny dahalo, nirifatra nandositra ireto farany rehefa nasain’ny zandary hijanona. Raikitra ny fifanenjehana. Vokany, lavo tsy lavitra teo ny iray tamin’ny dahalo. Voatifitra tany amin’ny 2 km nanenjehana azy kosa ny namany hafa. Mitaky ny fiaraha-mientan’ny fokonolona ny zandary ao an-toerana hanamora ny fisamborana ireo olon-dratsy.
Tsiferana R.
French