Notokanana omaly ny kianja fanaovana fanatanjahantena marolafy ao amin’ny CEG Antanimbarinandriana. Fiaraha-miasa amin’ny Fondation Axian, ao anatin’ny tetikasa « Mihetsika Mvola » no nahafahana namita ity fotodrafitrasa ity.
Ankoatra ny kianja, nasiana toerana manokana hahafahana misolo akanjo mialoha sy aorian’ny fanatanjahantena ihany koa mba handrisika ny vehivavy hiantsehatra amin’ izany.
Nanazava ny talen-tsekoly, Ravololomanana Lanto Harisoa, fa tena hanampy ny mpianatra ny fahazoana fotodrafitrasa satria tsy afaka miditra ao amin’ny Kianja Barea intsony izy ireo. 65 taona ny sekoly amin’izao fotoana ary fanomezana goavana izao kianja izao ho an’ireo ankizy
1 544 mianatra ao an-toerana.
Nanome toky ny hikolokolo ny toerana ny sekoly, indrindra ireo ankizy, mba hampaharitra sy ho lovain’ny hafa any aoriana ny kianja. Hitohy ny asa ho an’ny fanatsarana ny fotodrafitrasam-panabeazana ho an’ny Fondation Axian, raha ny fanazavan’ny tomponandraikitra, Andrianasolo Mialisoa. Kianja faha-21 naorina tamina sekoly ity notokanana omaly ity.
Tetsy andaniny, nandray avy hatrany ho mpiasam-panjakana ireo mpampianatra Fram ao amin’ity CEG ity ny minisitry ny Fanabeazam-pirenena. “Rehefa misy ny ezaka, mendrika hampiana ny sekoly ka hojerena akaiky ny hampiditra ireo Fram”, hoy ny tenany.
Tatiana A
French