Ho avy ny fotoam-pahavaratra ka ho tondraka sy hiakatra indray ny rano eto an-dRenivohitra, indrindra ny eny amin’ny faritra iva. Efa mandray ny andraikiny ny fanjakana sy ny Apipa mitady ny fomba rehetra hamahana izany. « Efa olana hatramin’ izay mihitsy io resaka lakandrano tsentsina sy rano miakatra io. Tokony hiova amin’ izay kosa ny toe-tsain’ny olona tsirairay. Satria, tsy vitan’ny fanjakana irery ny andraikitra », hoy ny fanazavan’ny sefo fokontany Anosizato Atsinanana, Rafanomezantsoa Jean Nirina, manoloana ity olana goavana sedrain’ny mponina eny amin’ny faritra iva ity. Nambarany fa ny ankamaroan’ny olona amin’izao fotoana izao, lasa toerana fanariam-pako ny lakandrano, eo koa ireo fanorenan-trano tsy manara-dalàna eny ambony lakandrano, manampy trotraka izany koa ny ara-boajanahary, toy ny fisian’ireo tsikafona maniry amin’izy ireny. Vokany, tsentsina tanteraka ny lakandrano. Izany no mahatonga ny tondradrano, toy ny eny Anosy, Ampefiloha hatrany 67 ha. Olana goavana koa ny fisian’ireo fako plastika izay anisan’ny tena manamora ny fahatsentsemana. Manana andraikitra amin’izany ny fiarahamonina, araka ny nambarany. Entanina ny rehetra fa saro-pady ny lakandrano. « Ao anatin’ny fanesorana ny fotaka manentsina ireny lakandrano ireny ny fanjakana amin’izao fotoana izao », hoy izy. Mbola hisy, araka izany, ny tondradrano, araka ny fanazavany hatrany.
Jean Claude
French