Hanainga anio, hihazo an’i Afrika Atsimo, hiatrika ny fifaninanana afrikanina “Jungle War”, taranja kick boxing, ny delegasiona malagasy. Atleta roa no hisolo tena an’i Madagasikara amin’izany.
Ny 9 novambra izao, ao amin’ny Emerald Casino, Vanderbijlpark Afrika Atsimo, no hanatanterahina ny fifaninanana “Jungle War”, eo amin’ny haiady kick boxing Full Contact. Hanana solontena roa lahy ny Malagasy. I Cyborg(-60kg), hifanandrina amin’ilay teratany Zimbaboianina eo amin’ny manasa-dalana sy i Joél(-54kg), hifandona amin’ ilay teratany Afrikana Tatsimo. Araka ny fantatra, nandritra ny fifaninanana Xtreme Combat natao farany, nokarakarain’ny klioban’ny Lion Force, no nifantenana azy roa lahy ireto. Nambaran’ny filohan’ny klioban’ny Lion Force, i Boto Gilbert, fa anisan’ny nahazo « ceinture » tamin’iny hetsika iny i Cyborg, raha nivoaka ho mpandresy kosa i Joël. Zava-dehibe ity fifaninanana ity satria firenena maro no handray anjara ary tafiditra amin’ny fiadiana ny tapakila amin’ny “Combat pro” izay hatao any Los Angeles, amin’ny taona 2025. Mbola hiverina hiady any Afrika Atsimo i Cyborg sy i Joël, raha tafavoaka mpandresy amin’io, hiady “ceinture”. Ankoatra izay, mbola manana solontena
7 mianadahy ihany koa i Madagasikara, hiatrika ady matihanina any La Réunion, izay hatao ny 14 desambra ho avy izao. Atleta sangany avokoa izy ireo, ahitana an’i Franck
(-75kg), Fabrice(-67kg), Dom (-63kg), Tsila(-63kg), Cyborg (-54kg) ary Fahendrena (-65kg) sy Larissa (-62kg) no vehivavy. “Miroso mankany amin’ny matihanina ny Malagasy mpikatroka”, hoy i Boto Gilbert, ka miantso hatrany ireo malala-tanana hitondra fanohanana satria voninahi-pirenena no arovan’ireto atleta ireto any ivelany. Nohamafisiny fa mianto-tena hatreto ny Lion Force mandefa ny atleta mifaninana any ivelany.
Mi.Raz
French