INDRAY MIJERY

Mbola ambony ny tahan’ny fahalotoan’ny rivotra eto Antananarivo ka mety hankarary ny olona rehetra. Ao anatin’ny telo andro ho avy, vinavinaina hidina ny tahan’ny fahalotoan’ny rivotra eto Antananarivo raha ampy hanadio ny rivotra ny rotsakorana antenaina amin’izao faran’ny herinandro izao. Hivangongo amin’ny afovoantany, avaratra andrefana ary atsimo atsinanan’ny Nosy ny orambaratra mitsitokotoko ho an’ny roa andro manaraka.
Ho fanatsarana ny fitantanana ny asa, nandalo
fiofanana manokana momba ny haitarika na leadership tao amin’ny sampam-piofanana Inscae ireo tale mpitantana eny anivon’ny foibe sy ny faritra eto anivon’ny minisiteran’ ny Fahasalamam-bahoaka. Hanamafisana ny fahaiza-mitarika, fanapahan-kevitra ary fahaiza-mitantana amin’ny fomba mahomby no tanjona.
Noraiketina ny fifanaraham-piaraha-miasa eo amin’ny minisitry ny Fampianarana teknika sy ny orinasa Europ’Alu. Mifototra amin’ny sehatra telo: famolavolana fandaharam-panofanana momba ny menuiserie aluminium”, fandraisan’ny orinasa ireo tanora hampihatra ny fiofanana mifandimby ary ny fifampizarana traikefa sy fahaiza-manao eo amin’ny roa tonta.