Notanterahina ny sabotsy lasa teo, teny amin’ny Ininfra Alarobia, ny fivoriambe ara-potoan’ny Federasiona malagasin’ny atletisma (FMA). Taorian’ny tatitra ara-bola sy ny ara-teknika nataon’ny komity mpitantana, nandritra ny taom-piasana 2024, nahazo fankatoavana “quitus” avy amin’ireo ligim-paritra 13 izy ireo.
Tetsy ankilany, nankatoavina ihany koa ny lalàna mahakasika ny fanoherana ny herisetra mahazo ny atleta. Ankoatra izany, nisy ny fangatahan’ireo ligy toy ny hanatontosana ny fifaninam-pirenena any amin’izy ireo. Eo ny amin’ny tokony hanomezana mari-boninahitra ho an’ireo atleta sy mpanazatra na mpitantana nahavita be teo amin’ity taranja atletisma ity. Nambaran-dRaherison Dominique, filohan’ny federasiona fa mibaby trosa 90 tapitrisa Ariary izy ireo tamin’ny fanatontosana ny fifaninanam-pirenena sy niatrehana ireo lalao tany ivelany. Araka izany, miantso ny minisitera mpiahy izy ireo mba hijery sy hanome tanana indrindra amin’ny fiatrehana ny taom-pilalaovana 2025. Notsiahivin’ity lehiben’ny federasiona ity, fa ny taranja atletisma no nitondra avo hatrany ny voninahi-pirenena. Porofon’izany ny nahazoana ny medaly tamin’ny lalaon’ny firenena miteny frantsay sy nandritra ny fiadiana ny ho tompondakan’i Afrika, ary ny lalaon’ny Nosy 2023, izay natao teto Madagasikara farany teo.
Tompondaka
French