Nitohy ny alahady teo, teny amin’ny Kianja Makis Andohatapenaka, ny andro fahasivy amin’ny fiadiana ny ho tompondakan’i Madagasikara, taranja rugby, “XXL Top 12”. Anisan’ny lalao nandrasan’ny rehetra ny an’ny FTM Manjakaray sy ny Uscar. Tsy mbola afa-bela fa resin’ny Manjakaray indray ny Uscar. 44 no ho 30 ny isa nisarahan’ny roa tonta. Ny fizaram-potoana voalohany ihany no hany afaka nanohitra ny ekipan’ny kaominina Antananarivo Renivohitra. Nifanakaiky ny isa teny amin’ny solaitrabe, na dia nitarika tamin’ny isa 15 no ho 14 aza ny FTM.
Fizaram-potoana faharoa, nanao fahadisoana taktika ny Uscar izay nilalao baolina tany amin’ny taniny ka nahafahan’ny Manjakaray nahazo fahadisoana. Nisesy, araka izany, ny baolina nentin-tanana vitan’ny FTM tamin’ny alalan’i Jean-Yves. Nisy ihany ny “essai” vitan’ny Uscar saingy tsy ampy nanenjehana ny Manjakaray izany. Teo amin’ireo vokatra hafa, TFA nandresy an’Ankadifotsy, 35 no ho 24, ary nomontsanin’ny Cosfa, 78 no ho 16, ny 3FB.
Tompondaka
French