Tovolahy iray mpianatra ao amin’ny sekolin-dry Masera ao Tanamakoa Toamasina no natelin’ny rano tao Ambalamanasy, ny alatsinainy teo, rehefa nandeha nitifitra vorona. Raha ny fampitam-baovao voaray avy any an-toerana, nanao fialan-tsasatra tao amin’ ny raibeny ao Ambalamanasy ity tovolahy ity ka nanenjika vorona teny rehetra teny. Nanidina moramora nanatona moron-drano ilay vorona. Notifirin’izy telo lahy. Voatifitra anefa ilay vorona ka nilatsaka teny ambony rano ao Ambalamanasy. Tsy nisalasala ny tovolahy iray fa nanala akanjo ka nilomano naka izany kanjo nalentiky ny rano avy hatrany. Niantso vonjy tamin’ireo olon-dehibe teo an-tanàna ireo namany ka natao ny fikarohana. Ny alatsinainy tolakandro vao hita ny fatiny. Nandritra ny fikarohana ny razana no nitantaran’ireo olobe ny trangan-javatra toy izao fa ny vorona raha tifirina ka milatsaka an-drano dia miova ho lolo. Raha te haka ireny dia tsy mahazo milomano fa mandeha lakana ka alaina amin-javatra hafa izy fa tsy azo alaina amin’ny tanana mivantana, araka ny voalazan’ny Olobe, Bendrandriana Augustin, mpahay fomban-drazana.
Sajo/J.C
French