Hanomboka ny alatsinainy ho avy izao ny roa volana fahatelo amin’ny taom-pianarana sy ny fandraisana ny fisoratana anarana ho an’ny fanadinam-panjakana CEPE. Ny 8 janoary vao handray ny fampianarana telo volana faharoa kosa ny sampana teknika.
Hiroso amin’ny telo volana fahatelo amin’ny taom-pianarana 2024-2025 ny mpianatra amin’ny ambaratonga rehetra, manomboka ny alatsinainy ho avy izao. Ny
21 febroary vao hifarana izany ary miditra amin’ny fiatoana ny fampianarana manomboka ny 22 febroary hatramin’ny
2 marsa ho avy izao. Miatrika ny Andron’ny sekoly ny ivontoeram-pampianarana rehetra ny 19 ka hatramin’ny 21 febroary. Fotoana hanadiovana ny faritry ny sekoly sy hanaovana hetsika ara-panatanjahantena koa ny hateloana hanamarihina ny izany. Miala sasatra mandritra ny sivy andro ny mpianatra aorian’izay vao misantatra ny roa volana fahefatra, ny 3 marsa hatramin’ny 11 avrily. Ny roa volana fahatelo no herin’ny fampianarana sy ny fanatanterahana ny fandaharam-pianarana raha mbola fampitoviana lenta ny fari-pahaizana ny roa volana voalohany ary fanombohana ny lesona rehetra ny roa volana faharoa.
Ho an’ny EPP iray ato anatin’ny Cisco Antananarivo Renivohitra, nisy fivoarana kely ny fari-pahaizan’ny mpianatra raha mitaha ny tamin’ny fitsapana ho an’ny roa volana voalohany. “Tsy ampy mpampianatra koa ny EPP. Satria, nafindra toerana ireo nisahana ny kilasy sasany ary tsy mbola nahazo solony. Mety misy fiantraikany amin’ny vokatry ny fanadinana atao isaky ny fiafaran’ny roa volana izany”, hoy ny talen’ny EPP.
Hisokatra ny alatsinainy ho avy izao koa ny fandraisana ny fisoratana anarana ho an’ny fanadinam-panjakana voalohany, CEPE 2025. Haharitra hatramin’ny 28 febroary ny fandraisana ny antontan-taratasy rehetra avy amin’ny sekoly sy ny mpiadina miahy tena. Hotontosaina ny talata 17 jona ny fanadinana CEPE, amin’ity taona ity.
Ny 13 janoary ho avy izao ny fanombohan’ny fisoratana anarana ho an’ny fanadinana BEPC. Hikatona ny 7 marsa izany. Hiatrika ny fanadinana ny mpiadina ny 30 jona ka hatramin’ny 3 jolay, manerana ny Nosy.
Hanomboka ny 8 janoary ho an’ny teknika
Ho an’ny fampianarana teknika, ny 8 janoary no fanombohana ny telo volana fahatelo amin’ny taom-pianarana. Hifarana ny 22 marsa izany ary hiroso amin’ny fiatoana mandritra ny fialantsasatry ny paka, manomboka ny 23 marsa hatramin’ny 2 avrily ho avy izao. Andron’ny toeram-panofanana arakasa sy ny Lycée teknika ny 28 febroary ka hatramin’ny 1 marsa.
Vonjy
French