Nitrangana fanafihan-dahalo tao amin’ny fokontany Ampandrabe, kaominina Ankilizato, distrikan’i Mahabo, omaly. Niditra an-keriny nandroba omby miisa valo teo an-toerana ny andian-dahalo nirongo basy. Vokany, raim-pianakaviana iray 36 taona teo no maty voatifitra tao an-tranony tokony ho tamin’ny 02 ora maraina. Vita izay, norobain’ireo olon-dratsy ny omby.
Ankoatra izay, lavon’ny polisy avy ao Menabe, omaly ihany koa ny tovolahy iray, malaza mpangalatr’omby ao an-toerana. Ikoizana amin’ity asa ratsiny ity ny lehilahy ka nandray fepetra ny fokonolona. Nisy, araka izany, ny andrimaso natao ka voasambotra omaly io izy ary noentina nihazo ny biraon’ny mpitandro filaminana. Nanao tari-dositra anefa izy nony teny an-dalana ka voatery nampitandrina azy ny polisy. Tsy nijanona ilay jiolahy fa nanohy ny diany hatrany. Vokany, voatery nitifitr’azy ny mpitandro filaminana ka lavo tao amin’ny fokontany Andranoteraka izy, tokony ho tamin’ny 12 ora sy sasany .
Henintsoa Hani
French