Narian’ireo olon-dratsy teny an-dalana ny rongony valo gony notanteriny avy any Andakalaka, kaominina Marovoay, ny alahady 26 janoary teo. Efa-dahy nitondra entana tamin’ny gony maromaro nifanehatra tamin’ny mpitandro filaminana. Nampiahiahy tanteraka ny fihetsik’ireo vatan-dehilahy ireo teo anelanelan’Antafiambazaha sy Maevarano. Nandositra avy hatrany ireo efatra mirahalahy vantany nahatazana ny mpitandro filaminana nanao ny fisafoana. Nosavaina ny gony. Rongony avokoa no nameno ireo gony niisa valo. Niezaka nikaroka ireo nitatitra ireo entana ireo ny zandary saingy tsy hita popoka ireo efa-dahy. Nolanjainy, nahatratra 139 kg ireo rongony nafatratra anaty gony ireo. Nogiazan’ny zandary, hodorana aorian’ny fahazoana alalana hanatanterahana izany io zava-mahadomelina io. Tsiahivina, vao rongony nahatratra 1 taonina mahery nodoran’ny polisim-pirenena teny amin’ny kaominina Ambohitrimanjaka ny herinandro lasa teo. Nentina avy any Toliara, nokasaina hamparitaka teto an-dRenivohitra ireo zava-mahadomelina io.
Tsiferana R.
French