Ady amin’ny herisetra an-tsekoly : Hametraka vondrona fizarana ny Psy-kôzy Madagascar

Iray amin’ny andraikitry ny fikambanana Psy-kôzy Madagascar, fikambanana misehatra amin’ny tontolon’ny fahasalaman’ny saina ny ady amin’ny herisetra an-tsekoly, satria ny herisetra an-tsekoly (nandritra ny fahazazana) no anisany antony mitarika amin’ny tsy fahatomombanana ara-tsaina rehefa lehibe ilay olona.

“Ny taona 2024, na­nomboka tamin’ny atrikasa efatra momba ny herisetra an-tsekoly, teto Antananarivo, ny mpikam­bana. Nisy fijoroana vavolombelona nentin’ny olona niha­ran’ny herisetra tany an-tsekoly na koa ray aman-dreny manana zanaka niharany na olona nian­jadiany tany aloha fa mbola mizaka ny vokany hatramin’ izao”, hoy ny mpandrindra ny tetikasa ao amin’ny fikambanana, Ranorovelo Heritiana, omaly. Narahina velakevitra momba ny herisetra an-tsekoly ny novambra 2024, tamin’ny alalan’ny fanentanana, nahi­tana seho an-tsehatra, antsa tonokalo sy fandraisana fa­nontanian’ny mpanatrika, teny amin’ny Tranombokim-pire­nena Anosy. Mpampianatra sy mpianatry ny Lycée ny ankamaroan’ireo tonga.

Miteraka fahaketrahana lalina (dépression), fikoron­tanan’ny fitondrantena manoloana sakafo, ratra anaty ao­rian’ny dona mahazo ary fi­tain­tainana lava ny herisetra an-tsekoly eo amin’ny lehibe sy ny ankizy. Tanjon’ny fikam­banana Psy-kôzy Madagascar ny hametraka vondrona fiza­rana sy fandraisana an-tanana tsirairay ataon’ny “psychologue” eny anivon’ny sekoly ho an’ny mpianatra mila fano­hanana ara-tsaina amin’ny tetikasa “Komby”. Efa natomboka ny fametrahana von­drona fizarana fa eo am-pikara­karana ny fifanarahana amin’ny sekoly ao amin’ny boriborintany I ny tomponandraikitra ho fanombohana izany.
Olona telo isan’andro…

Misy koa ny fanentanana amin’ny tambajotran-tserasera manomboka amin’ity taona ity, ahitana fijoroana vavolombe­lona ataon’ny ankizy niharan’ny herisetra. Isan’andro, misy ta­nora (ma­nodidina ny 20 na 30 taona eo ho eo) telo efa niharan’ny herisetra an-tse­koly tany aloha ka mizara ny tranga sy ny niainany izany.
Isaky ny sabotsy fahefatry ny volana diavina eto Anta­na­narivo, mikarakara vondrona fizarana momba ny herisetra an-tsekoly miaraka amin’ny olona niofana manokana “psy­chologie clinicienne” ny fikambanana. Voafetra ny isan’ny olona afaka manatrika ka ilaina ny misoratra anarana mialoha amin’ny pejin’ny fikambanana.

Vonjy