Niavaka tamin’ny soratra, ka nahazo ny fankatoavan’ireo namany “mpilalao rima” i Tax Bouta. Iray amin’ireo andrin’ny rap gasy izy, izao folaka an-dantony izao…
Misaona ny tontolon’ ny zavakanto amin’ ny ankapobeny, sy ny fiakaviamben’ny mpiangaly rap gasy manontolo. Nodimandry omaly, Rafanomezantsoa Iarisolo, fantatry ny maro amin’ny anaram-bositra hoe Tax Bouta. Efa tamin’ny volana desambra izy no nokikisan’ny aretina ka tsy nahatohitra izany, ary folaka an-dantony teo amin’ny faha-42 taonany.
Anaram-bositra sady nentiny nametraka tantara ho an’ny rap gasy koa ny hoe Tax Bouta. Mpiondana ny “Haintso-Haintso” toa ireo namany rehetra zatovo, tamin’ ny taona 90 izy. Nahita ny niatombohan’ny rap gasy rehefa nirona tamin’ny fihirana ireo namany vitsivitsy. Nitankosina tamin’ireo mpanao rap maro tamin’ny Cité Amparibe, izay toerana nahaterahan’ ny rap gasy teto Madagasikara i Tax Bouta. Toa ireo namany rehetra, niroso tamin’ny fanoratana sy nihira ihany koa i Tax, ny taona 1998. Anisan’ ireo hira nanoka-dalana ny rap gasy ny “Ady ny fiainana”, izay sanganasany.
Io taona 1998 io ihany no nifankahalalan’i Tax Bouta sy i Tax Da-Hopp (X-Tah), na nananganan’izy ireo ny tarika Rapadango. Nanatevina ny tarika taorian’izay i Bambs, ary mbola i Tax Bouta aloha no nanoratra ny anjaran-tononkirany tany am-boalohany. Nanaraka i Tongue Nat (18,3) sy i Farah Femcee taty aoriana, ka anisan’ireo tarika nametraka tantara satria nahavita rakikira telo ny Rapadango. “Rapadango” nivoaka tamin’ny 2000 ny voalohany. Ny faharoa dia “Eo Foana”, saingy tsy nivoaka. Ny fahatelo kosa dia “Tsy hakako L”.
Anisan’ireo mpikambana ao anatin’ny vondrona Dio VXI ihany koa i Tax Bouta. Nisokatra be tamina mpanakanto maro izy, teo amin’ny mozika.. Efa mpikambana tao anatin’ny tarika Mik Mak Crex izy, niaraka tamin’i Tongue Nat sy Slam Jah. Niara-nihira tamin’i Tiffen, ary anisan’ireo niaraka tamin’i Marion tamin’ny nanombohany. Niaraka tamin’i DJ Denis sy ry Rakoto Frah Junior tanatin’ilay hira “Vaky ny Sova”, sns.
Hoy ireo namana akaiky an’i Tax Bouta:
Tax Da Hopp: “Lasa ilay zandrikeliko anatin’ny rap e ! Ilay tsara fanahy indrindra amin’izahay “Tax” rehetra haiko. Tsara daholo ny zavatra tadidiko aminy ry zareo…”
Bambs: “Be dia be ny fahatsiarovana fa aleo aloha aho hangina satria … “Kenda aho»
Tongue Nat: Tax : Malaelo ny fo… tadidiko ery ny sovenira tsara indrindra niarahantsika hoe hiakatra Antsahamanitra tamin’ny “Afondasy 1” hoe hapoakantsika io… “Ady ny Fiainana” hoy ilay hira niarahana izay, vita izany ny adin’ialahy lesy…
Rado DRB: “Voninahitra ho ahy no niara nifampizara mic, sehatra, vazo ary zavatra maro tamin’ialahy … Ho feno fahasambarana any amin’izay misy an’ialahy lesy…”
Nangonin’i Zo ny Aina
French