Andrasana fatratra izay ho fitrangan’ny sehon’i Njakatiana ao amin’ny Coliseum. Anisan’ireo mpanakanto mametraka fanamby ambony foana koa mantsy izy.
«Ho antsika mianakavy jiaby». Tsy lohatenin’ny fampisehoana akory, fa lohahevitra hovoizina mandritra ilay fampisehoana hotontosain’i Njakatiana, ny alahady 4 oktobra izao, etsy amin’ny Coliseum Antsonjombe io. «Ny tarika Njakatiana te haneho zavatra goavana amina sehatra goavana ka io Coliseum io no lehibe indrindra, hatreto. Hamaliana ireo mpankafy tsy dia havanana mijery seho anaty efitrano na kianja mitafo, ka manontany foana hoe rahoviana ny seho ankalamanjana lehibe?», hoy ny nambaran’i Njakatiana nandritra ny fampahafantarana ny seho tamin’ny mpanao gazety, tetsy amin’ny foiben’ny BGFI Bank etsy Ankorondrano.
Mpanakanto sarotiny amin’ ny kalitaon’ny seho izay ataony hatrizay, no manana aingam-panahy miavaka hatrany i Njakatiana rehefa manao seho goavana. Ho maro ireo hanampy azy eny an-tsehatra, ahitana ireo mpanao feo lafika, ireo mpiangaly zavamaneno tsofina ankoatra ireo mpitendriny mahazatra. Hisy tarika mpandihy roa hafa koa ankoatra ny efa mpanaraka ny tarika. « Mitaky fanamafisam-peo raitra ary fitaovana isan-karazany izany, ka hifarimbona ao ny Miritsoka sy Jay Audio », hoy hatrany i Njakatiana. Ny tarika no manomboka ny seho lehibe fa hisy namana hasaina eny anelanelany eny. Ny maraina kosa, hisy mpanakanto hafa mihitsy mba hanafana tsikelikely ny sehatra mialoha, ho an’ireo tonga aloha.
Zo ny Aina
French