Mijoro sy sahy amin’ny fanatanterahana ny politikam-panjakana ny fikambanana DHEA. Vonona ny hitondra ny traikefany notovoziny teny amin’ny Enam izy ireo hampandrosoana ny firenena.
Nanao fihaonambe ireo mpikambana ao amin’ny DHEA na fikambanan’ireo mpianatra nahazo ny Diplômes en hautes etudes en administration, cycle expertise ao amin’ny sekoly ambony Enam.
Mampivondrona ireo rehetra nahavita fiofanana tao ny fikambanana ary mijoro ho tomponandraikitra mahatoky amin’ny fandraisana andraikitra hampandroso ny firenena, hoy ny filohan’ny DHEA, Ramanantsoa Andriamahafaly Rado. Efa andiany fito izy ireo amin’izao ary mahatratra 900 ireo mpikambana.
Nomena andraikitra hanatanteraka ny politikam-panjakana napetraky ny governemanta sy ny filoham-pirenena ireo mpikambana izay efa mpiasa manana andraikitra ambony eto amin’ny firenena avokoa.
Misy sampana efatra ao amin’ny fiofanana ho mpiasam-panjakana ambony dia ny Administration publique, administration financière, diplomatie et relation internationale ary ny hay ara-kajimirindra. Miantsehatra amin’izany fahaiza-manaony izany avokoa ireo voaofana ary manatanteraka ny fandrindrana rehetra apetraky ny fanjakana.
Omeo andraikitra ireo olona nofanina eny amin’ny sekolim-pirenena Enam hahafahany mitondra fampandrosoana sy ny fahaiza-manao nanofanana azy. « Misaotra ny fanjakana nametraka fitokisana aminay amin’ireo andraikitra napetraka ary vonona ny hanatanteraka hatrany ny asa ampanaovina izahay », hoy hatrany ny DHEA.
Mpiasam-panjakana avokoa ny mpikambana ao amin’ny DHEA izay manana ny categorie 8 fara faha keliny izy ireo. Manana traikefa ary vonona hitondra ny anjara biriky amin’ny fampandrosoana an’i Madagasikara.
Tsiahivina fa ny volana avrily 2024 no nijoro ara-dalana ny fikambanan’ireo nahazo diplaoma ambony amin’ny fanofanana mpiasam-panjakana (DHEA) ary manamarika ny herintaona nijoroany izy ireo ankehitriny.
Tatiana A
French