Nizara ny vokatry ny fanadihadiana momba ny fahasalamana ara-pananahana ho an’ny olona manana fahasembanana ny fikambanana Autisme Madagasikara anatin’ny tetikasa Miray, omaly, teny Antaninarenina.
Nanasongadina ny vokatra fa mbola misy ny sakana sy ny fady amin’ny firesahana fahasalamana sy zo ara-pananahana ho an’ny olona manana fahasembanana eto amintsika. Taorian’ny fidinana ifotony sy ny firesahana amin’ny olona manana fahasembanana ary ny mpandray an-tanana azy ireo, tsapa ny tsy fahampian’ny firesahana ny lohahevitra. “Eo amin’ ny fanabeazana koa tsy voaresaka izany. Manampy trotraka ny fanilikilihana avy amin’ny fiarahamonina izay mieritreritra fa tsy ilaina ny miresaka fananahana sy fahafinaretana amin’ny olona manana fahasembanana”, hoy ny mpandrindra ny tetikasa Miray ao amin’ny Autisme Madagascar, Mihanta Ravelonarivo.
Vokatra azo tao anatin’ny tetikasa koa ny fampitaovana. Nahavita namolavola fitaovana “malette SSR inclusive” ahafahan’ny olona manana fahasembanana mampita amin’ny fahasalamana ara-pananahana sy ara-piraisana. Efa nofanina ny olona manana fahasembanana hampiofana ny olona hafa mitovy aminy.
“10 taona ny fikambanana Autisme Madagascar, betsaka ny adisisika natao teny anivon’ ny minisitera samihafa fa tsy mbola misy ny fiahiana sosialy ho an’ireo olona ireo sy ny fianakaviany hatramin’izao”, hoy ny filoha mpanorina ny fikambanana, Raveloarimisa Mbolatiana. Tsy mbola ampy hisahana ny filana ny psychologue, psychomotricien…handray an-tanana ny autiste. Tsy misy ny zavatra azo tsapain-tanana avy amin’ny fanjakana ho tohana ho an’ny fianakaviana sy ny fikambanana mpiahy. Andrandraina ny fandraisana an-tanana avy amin’ny fanjakana amin’ny lafiny maro satria ny an’ny fikambanana dia voafetra ihany.
Vonjy
French