Mbola mba tafiditra ao anatin’ny fandaharam-pianarana ihany aza! Tany amin’ny taona 1972 no efa tsikaritra fa tsy mety na tsy ampy na tsy sahaza ny taranaka malagasy ny zavatra ianarana ao anatin’ny taranja malagasy. Taom-pianarana 2025 – 2026, tsy mbola hita taratra ny fanovana. Tsy mbola manangasanga ihany ny hahitana fa misy taranja malagasy ianaran’ny taranaka Malagasy any an-tsekoly.
Sady tsy mahay mamaky teny malagasy. Tsy mahay miteny malagasy. Votsa amin’ny fifehezana ny fitsipi-pitenenana malagasy. Tsy mahafantatra ny fomba amam-panao malagasy. Tsy mahalala ny fiarahamonina malagasy. Tsy manana tadidy vava sy lovan-tsofina momba ny Malagasy. Fa inona no nianarana ao amin’ny taranja malagasy?
Mila fanarenana sy fanavaozana lehibe ireo zavatra ianarana ao amin’ny taranja malagasy. Tsy omen-tsiny ny mpampianatra, satria, izay voarakitra ao anatin’ny fandaharam-pianarana ihany no arahiny. Tahaka izay ihany koa ny mpianatra. Manana manam-pahaizana maro momba ny teny malagasy ny Malagasy. Hatramin’izao, anefa, tsy mbola misy akony any amin’ny taranja malagasy, na misy ihany fa ambilombazana, ny asa fikarohana ataon’izy ireny.
Miainga any amin’ny ambaratonga fototra ka mipaka any amin’ny ambaratonga ambony. Mila fanavaozana ny taranja malagasy, raha tena te hiverina any amin’ny fototra marina.
HaRy Razafindrakoto
French