Tazomoka ao Vangaindrano : nofanina ireo lehiben’ ny CSB miisa 56

Ao anatin’ny faritra mbola ahitana aretina tazomoka betsaka ny ao amin’ny distrikan’i Vangaindrano. Nofanina ha­naraka ny kalitaon’ny fitsaboana ity aretina ity, ireo lehiben’ny CSB miisa 56 any an-toerana. Avy amin’ny tobim-pahasalamana tsy miankina any an-toerana ny telo amin’ ireo nahazo fiofanana. Tanjona ny hisitrahana fomba fitsaboana ny aretina tazomoka mitovy any an-toerana, hisian’ny fahombiazana ary ialana amin’ny fahafatesana. Tobim-pahasalamana mandray marary ary manana ny fitiliana hanaporofoana na aretina tazomoka na tsia ireo nomena fahaiza-manao.
Ao anatin’ny vanim-potoanan’ny fahavaratra no tena mampirongatra ny aretina tazomoka, vokatry ny rano mihandrona, ny hafanana…

Mila mampiasa lay misy odimoka hatrany, indrindra ho an’ireo zaza sy reny mitondra vohoka ialana amin’ny aretina. Ireo mamonjy toerana itobiana amin’izao fiakaran’ny rano izao dia mila matory anaty lay misy odimoka hatrany ho fiarovan-tena.

Tatiana A