Izao ariary ny hasintanana. Misy sarany ny fampianarana. Misy fandraisana anjara tahaka izao satria misy fandaniana atao… Tsy ireo velively no tian’ ny Malagasy henoina raha vao miresaka fampianarana zavakanto na kolontsaina. Ny azy, mila tolotra maimaimpoana hatrany. Fihetsika mametraka ny kolontsaina sy ny zavakanto ho tsinontsinona? Tsy misy sandany? Maivana? Tsy mby ao an-tsain’ny Malagasy loatra ireo fanontaniana ireo.
… Satria, tsy nobeazina tamin’ny fahaizana amam-pahalalana momba ny soa azo avy amin’ny kolontsaina sy zavakan-to ny Malagasy. Nanadino ny fifanomezan-kasina ihany koa. Vokatr’ireo, tsy fantany intsony fa manana fivelarana goavana amin’ny maha olona ny voataiza amina zavakanto sy kolontsaina. Manana saina maranitra sy tony, fo emboka, fanahy mivelatra. Afaka mampiasa tsara ny feon’ny fieritreretany…
… Ireny soa ireny, anefa, no fantatry ny Amerikanina, Sinoa, Anglisy, sns, ka mahatonga azy ireny mametraka ho laharam-pahamehana ny fianarana zavakanto sy kolontsaina. Ireny no mametraka azy ireo ho eny amin’ny laharana voalohany amin’ny lafim-piainana maro. Ny zaza amerikanina iray, vao mifoha, tsy maintsy mihaino mozika klasika mialoha ny hanaovany zavatra hafa. Ny fandaharam-pianarana any amin-dry zareo Sinoa, tsy maintsy ampidirana fianarana zavakanto sy kolontsain-drazana. Ny an’ ny Malagasy, ezahany fafana?
HaRy Razafindrakoto
French