Tsy vitan’ny mivarotra, mitsindrona zava-mahadomelina mahery vaika koa ireto roa lahy tra-tehaky
ny mpitandro filaminana tetsy 67 ha ireto, ny asabotsy lasa teo.
Tanora vao herotrerony avokoa ireto roa lahy nosamborin’ny polisy misahana ny ady amin’ny zava-mahadomelina tetsy 67 ha ireto, ny alin’ny zoma 27 janoary hifoha asabotsy 29 janoary teo. Mikirakira héroïne, efa malaza ratsy amin’ny fanaparitahana izany eny amin’ny manodidina izy mirahalahy ireo. Nanao fanadihadiana sy fikarohana mahakasika ny fisian’izy ireo, arak’izany, ny teo anivon’ny polisim-pirenena. Nigadona teny 67 ha, faritra voatondro ho fivarotan’izy ireo io rongony mahery vaika io, ny 27 janoary teo. Sarona teo akaikin’ny Havana ny lehilahy iray izay anisan’ireo nokarohina. Natao ny fisavana, indro nahatrarana fonosana héroïne iray milanja 0,30 g teny aminy. Nentina natao fanadihadiana lalina io voasambotra io.
Indroa isan’andro
Potika tanteraka ireo tanora tafaroboka amin’ity karazan-java-mahadomelona ity ho an’ny eto an-toerana. Araka ny fanazavan’ity lehilahy tra-tehaka tetsy 67 ha ity teo anivon’ny polisy, in-droa isan’andro izy no midoroka io rongony io. Ampy azy ao anatin’ny telo andro kosa ity fonosana 0,30 g teny aminy ity. Ankoatra azy, lehilahy iray hafa tsy mifanalavitra amin’ny taona an’io koa noraisim-potsiny teo 67 Ha. Nahatrarana héroïne 1 grama teny amin’ity farany. Niaiky ny heloka vitany izy saingy nibaboka fa iraka fotsiny ihany mivarotra io rongony io. Mikarama 40.000 Ariary isan’andro izy mivarotra sady mijerijery ireo polisy misambotra ireo mpivarotra rongony tahak’azy.
Tsiferana R.
French