Notanterahina teny amin’ny Kianja mitafo Ankoay Ankorondrano, ny sabotsy lasa teo, ny fiadiana ny amboaran’i Madagasikara, taranja volley-ball, sokajy latsaky ny 20 taona sy ny diviziona faharoa (D2), lahy sy vavy. Nifampizarana tanteraka ny amboara tamin’ity fiadiana ny amboaran’i Madagasikara, sokajy U20 sy D2 lahy sy vavy ity, raha jerena ny voka-dalao. Nandrombaka ny amboara voalohany tamin’ny diviziona faharoa (D2), vehivavy, ny ekipan’ny Zandarimariam-pirenena (GNVB) rehefa nandresy ny ekipan’ny Akany Sambatra Itaosy (ASI) tamin’ny seta 3 no ho 2. Nahazo ny amboara faharoa tamin’
ny sokajy latsaky ny 20 taona, vehivavy, kosa ny ekipan’ny Bi’As, rehefa nandavo ny ekipan’ny GNVB tamin’ny seta 3 no ho 1.
Tetsy ankilany, lalao anisan’ny nandrasan’ny maro ny famaranana teo amin’ny ekipan’ny GNVB sy ny ASI. Raha ny vokatra, afa-bela tamin’ny ekipan’ny GNVB ny ASI, teo amin’ny sokajy lehilahy latsaky ny 20 taona, rehefa nibata fandresena tamin’ny seta 3 no ho 1. Resin’ny ASI tamin’ny isa 25 no ho 17 ny GNVB, teo amin’ny seta fahefatra farany, ka azon’izy ireo ny amboara, tamin’ity taona 2025 ity. Namarana ny fifaninanana ny sabotsy teo ny nandrombahan’izy ireo ny fandresena nanoloana ny ekipan’ny Nadjy, tamin’ny seta 3 no ho 1.
Tonga nanotrona sy nanome voninahitra ity fiadiana ny amboaran’i Madagasikara ity, teny an-toerana, ny minisitry ny Tanora sy ny fanatanjahantena, Rasambany Alain Désiré. Nohamafisiny, nandritra ny lahateny nataony, ny fahavononan’ny minisitera hanohana ny atleta.
Mi.Raz
French