Aseho amin’ny alalan’ny fambolen-kazo ny fandraisana andraikitra ho fiarovana ny tontolo iainana ao amin’ny sekoly iraisam-pirenena Maarif Talatamaty. Nohazavain-dramatoa Irmak Tuncer, sekretera fahatelo ao amin’ny masoivohon’i Torkia eto Antananarivo, fa hetsika iarahan’ny masoivohon’i Torkia sy ny mpianatry ny sekoly Maarif manatanteraka, anehoana fa manomboka amin’ny fahazazany dia efa beazina ny mpianatra ho tia sy hiaro ny tontolo iainana.
Miisa 177 ny zana-kazo novolena ho fanamarihana ny faha-102 taona ny Repoblikan’i Torkia, ny 11 novambra, sady faha-65 taona ny Repoblikan’i Madagasikara. Ho lasa 179 izany amin’ny taona ho avy satria ampiana zana-kazo roa isan-taona.
Nandray anjara daholo ireo solontenan’ny mpianatra ao amin’ny ambaratonga rehetra, ny ao amin’ny garabola hatramin’ny Lycée. Tanjona ny hampitombo ny fahatsiarovan-tenan’ny ankizy hiaro ny natiora dieny mbola kely. Karazan-kazo dimy no nambolena teny Fiakarana Ivato (accacia, kininina fotsy, filao, voasarimankirana, hazo fihinam-boa isan-karazany).
Nanazava ny teknika fambolen-kazo Ratsimanosika Benjamin, avy ao amin’ny minisiteran’ny Tontolo iainana. Nomarihiny fa tena mety tsara ny fotoana fambolena satria ny volana novambra no fotoana fiandohan’ny orana, mampiroborobo ny fitomboan’ny zavamaniry. Miisa 5 ny toerana fambolen-kazon’ny sekoly iraisam-pirenena Maarif, Anjeva, Ampangabe, Ambohidratrimo, Ral Imerintsiatosika, Fiakarana Ivato).
Njaka A.
French