Hany mamokatra simenitra eto Madagasikara, ny orinasa Cementis, na Holcim teo aloha any Ibity Antsirabe, faritra Vakinankaratra. Hita any an-toerana daholo ny akora fototra tena ilaina amin’ny fanamboarana simenitra, toy ny «calcaire», ny tanimanga, ny gypsa, ny «pouzzulane», sns. Nitsidika tany an-toerana ny minisitry ny Harena an-kibon’ny tany sy ny akora stratejika (MMRS), Rakotomalala Herindrainy Olivier, ny zoma 3 febroary teo. Nojereny koa ny fanatanterahana ny fifanarahana teo amin’ny fanjakana malagasy sy ity orinasa ity, mba hampiakarana avo dimy heny ny vokatry ny Cimentis. Satria, raha 200.000 taonina isan-taona ny famokarany teo aloha, hitarina ho 1.000.000 taonina isan-taona izany.
Antitra ny fotodrafitrasa
Tanjona ny hamatsiana ny tsena ato anatiny sy hampihenana ny fanafarana avy any ivelany. Ampy tsara ny tahirin’ny akora «calcaire» any Ibity, azo ampiasaina ato anatin’ny 40 taona, mifanandrify amin’io tanjona io. Miankina amin’ny orinasa Cementis ny famatsiam-bola hananganana fotodrafitrasa fanitarana ny orinasa. Nanentana ny hanafainganana izany ny minisitra, hanatrarana ny fandaharanasa fisandratan’i Madagasikara (PEM). Tsiahivina fa antitra ny fotodrafitrasa, efa tamin’ny 38 taona lasa (1985) no mbola ampiasain’ny Cementis, ankehitriny.
Narahi-maso ny tamberim-bidy
Ankoatra izany, nitsidika ny kaominina Ibity, distrika Antsirabe II koa ny minisitra Rakotomalala Herindrainy. Nojereny ny fomba ampiasan’ny kaominina ny tamberim-bidy aloan’ny orinasa Cementis. Nampiasaina izany toy ny nananganana fotodrafitrasa sekoly lisea, ahitana efitrano miisa enina sy rihana iray, efa eo andalam- pahavitana.
Marihina fa azon’ny tompon’andaikitra tsinjovina taona maromaro mialoha ny vola tokony hiditra amin’ny faritra iray. Tokony ho voaomana tsara, araka izany, ny fampiasana ireo fidiram-bola ireo arakaraka ny filana sy ny laharam-pahamehan’ny kaominina sy ny faritra, mba tsy ho lanilany foana izany.
Njaka A.
French