Tanjona amin’ny fanaingana ny toekarena ny famokarana mitodika amin’ny tsena. Tena misongadina aty afovoan-tany ny fambolem-bary, ny vokatra fanondrana, ny voamaina, ny fiompiana akoho amam-borona ary ny ronono.
Natao tany Antsirabe, ny 22 sy ny 23 janoary teo, ny Dinika fikaonandoha ho fanaingana ny toekarena isam-paritany ho an’Antananarivo. Voakasik’izany ny faritra Analamanga, Vakinankaratra, Bongolava ary Itasy. Manodidina ny 100 ny mpandray anjara. Nahitana solontena avy amin’ny tantsaha, mpiompy, sehatra tsy miankina, orinasa madinika sy salantsalany, ny tetikasa sy fandaharanasa, ny sampandraharaha isan-tsokajiny ary ny mpiara-miombon’antoka ara-bola sy ara-teknika miasa isam-paritra izany.
Fantatra fa miisa 8 ny seha-pihariana tena manan-danja sady laharam-pahamehana iraisan’ireo faritra 4 ireo. Azo trandrahina tsara, ahafahana mitodika amin’ny filan’ny tsena, mampivelatra ny fandraharahana ara-pamokarana (Agri-business). Eo ny vary, ny dipoavatra mena, ny kafe, ny katsaka, ny voly mamody, ny voankazo, ny akoho amam-borona ary ny ronono.
Hita ny vahaolana
Nandritra ny fifampidinihana, hita ny vahaolana hamahana ny sakana lehibe tsy nahafahana niroso amin’ny fandraharahana amin’ireo seha-pihariana ireo. Koa, ilaina ny fanamorana ny lafiny fananan-tany, ny fametrahana banky na sampandraharaha ara-bola madinika ho an’ny tantsaha mpamokatra, ny fametrahana rafitra mazava sy fotodrafitrasa hivarotan’ny tantsaha ny vokatra. Mila tohanana ny mpamokatra hanatsarana ny famokarana amin’ny alalan’ny fanapariahana ny masomboly ara-kalitao sy ny zezika mora vidy, sns.
Aorian’ny dinika isam-paritra, hatao afaka andro vitsy ny dinika voalohany eo amin’ny fanjakana sy ny tsy miankina. Hotanterahina tsy ho ela ihany koa ny dinika nasionaly ho fanaingana ny toekarena, handravonana ireo dinika isam-paritra rehetra.
Njaka Andriantefiarinesy
French