Distrikan’i Manandriana : tokantrano sahirana 7000 misitraka ny tetikasa Asa Avotra Mirindra

Nanara-maso ny fizarana ny vola fiahiana ara-tsosialy Asa Avotra Mirindra, tany amin’ny faritr’Amoron’i Mania, distrikan’i Manandriana, kaominina Anjoman’Ankona, ny praiminisitra lehiben’ny governemanta, Ntsay Christian niaraka tamin’ny minisitry ny Mponina sy ny fiahiana ara-tsosialy, Soafilira Princia, omaly.

Nandritra izany no nandefasana ny vola andi­any faharoa tamin’ny hetsika in’enina miantoana ho fanampiana ny mponina any an-toerana. Nanomboka oma­ly, nampiakarina 6000 Ar isaky ny tapak’andro ny vola raisin’ireo mpisitraka raha 4500Ar izany teo aloha. Rai­sina isaky ny 20 andro ny vola hahafahan’ireo tokantrano mi­voatra sy havitrika amin’ny asa fambolena sy fiompiana. Tokantrano sahirana miisa 7000 avy amin’ny kaominina 10 ao amin’ny distrikan’i Ma­nandriana no nisitraka izany. Toy ny tao amin’nykaominina Ambatomarina, Ambohimaha­zo, Ambohimilanja, Ambohi­po, Ambovombe Centre, Anjo­ma Nandihizana, Anjo­man’Akona, Ilanjana, Soatana­na ary Vinany Andakatanikely. Nilaza ihany ny praiminisitra fa hisitraka ny tetikasa ireo kaominina roa hafa ao amin’ny distrikan’i Manandriana.
Tetikasa Asa Avotra Mi­rindra miompana amin’ny fa­mokarana sy fihariana ary fiainana mihatsara no tanterahina any an-toerana.
Anisan’ny asa nisongadina ny fambolena tamina velaran-tany mirefy 97 Ha sy ny famokarana zana-trondro miisa 358.000. Ankoatra izay ny fanadiovana lakandrano mirefy 218.238 m sy famokarana zanakazo miisa 977.285. Ni­fanindran-dalana tamin’ny tohana ny fanomezana fiofanana amin’ny teknikam-pambolena sy fiompiana hahazoana vokatra bebe kokoa. Nisy ny fanentanana amin’ny fanaovam-baksiny miaro amin’ny covid-19, fampiasana lavapiringa, fanaovana karapanondrom-pirenena…
Distrika telo ao amin’ny faritra Amoron’i Mania no mi­sitraka ny tetikasa Asa Avotra Mirindra. Anisan’izany Ma­nan­driana sy Ambositra ary Fandriana. Mitontaly 22.500 tokantrano ny mpisitraka. Hiitatra amin’ny distrikan’ Amba­tofinandrahana ny tetikasa ato ho ato. Nataon’ny filoham-pirenena ho laharam-pahamehana ny fiahiana ny sosialim-bahoaka. « Taonan’ ny sosialy ny 2023. Natao tao anatin’ny efa-taona ny fananganana fotodrafitrasa fa hi­fantoka amin’ny sosialim-bahoaka izao », hoy ny praiminisitra lehiben’ny governemanta, Ntsay Christian.

Tatiana A