Ady amin’ny tsy fanjarian-tsakafo : « Ilaina ny fitsinjaram-pahefana amin’ny asa », hoy ny Hina

Nidina ho 37% ny tahan’ny tsy fanjarian-tsakafo mitarazoka ho an’ny zaza latsaky ny 5 taona, raha nahatratra 41,6% ny taona 2018. Vokatry ny dinika momba ny toe-piainan’ny ankohonana (Mics 2024-2025) izany.

Anisan’ny nandray anjara mivantana nahazoana ny vokatra ny mpikambana amin’ny Vovonan’ny firaisamonim-pirenena momba ny fanjarian-tsakafo (Hina). Na­na­tontosa hetsika maro ny mpikambana nanomboka ny taona 2018. Fanatanterahana ny Drafitrasam-pirenena fahatelo ho an’ny fanjarian-tsakafo (Pnan III) izany, araka ny fanazavan’ny filohan’ny filankevi-pitantanany, i Hantarinivo Faniry, ny herinandro lasa teo, teny Antaninarenina. nandritra ny fivoriamben’ny mpikambana. Nisongadina ny hetsika ho an’ny 1 000 andro voalohany eo amin’ny zaza, ny fanentanana fanatsarana ny sakafo eny ifotony, ny fampinonoana tsy misy fangarony. Eo koa ny fanaovana vaksiny, ny sakafo miovaova sy maroloko. Na­nampy izay ny fanentanana amin’ny fampiasana ireo vokatra misy amin’ny toeram-pisakafoana any an-tsekoly ho sakafo mahavelona.
Tanjon’ny Fampandro­so­ana maharitra (ODD) ny tsy hisian’ny hanoanana intsony amin’ny taona 2030. Mbola lavitra ny vina fa mila asa mirindra kokoa. Zava-dehibe ny fampahafantarana ny fanjarian-tsakafo satria miova araka ny mpisehatra izany. Ho an’ny Vovonana Hina, tokony ho marolafy ny fanjarian-tsakafo izay misahana ny rafitra rehetra hanome zo fototra hisakafo, ho salama, hanana rafitra fahasalamana matanjaka. Apetraky ny fitondrana ankehitriny ho laharam-pahamehana ny sehatra sosialy ka tokony hisy rafitra sy tetibola mifanaraka amin’izany. Efa misy politikam-panjakana samihafa (politika nasionalin’ ny fahasalamana, ho an’ny fanjarian-tsakafo, …) izay efa rafitra mipetraka ka ny fanantanterahana ireny no maika izao, raha ny voalazany ihany.
Fanambin’ny Hina, taorian’ny fihaonambem-pirenena N4G tany Paris, ny hidinana ho 25% ny tahan’ny tsy fanjarian-tsakafo mitarazoka. Ha­ma­fisina ny ady amin’ny tsy fanjarian-tsakafo izay tokony ho marolafy ary andraisan’ny minisitera rehetra voakasika anjara. Zava-dehibe koa ny fitsinjaram-pahefana ka tokony hotsinjaraina ny sorabola sy ny asa.

Vonjy