Hiatrehana ny tsifanjarian-tsakafo any amin’ny tapany atsimon’ny Nosy vokatry ny haintany dia nanolotra sakafo milanja 5 000 taonina ny amerikanina.
Natolotry ny mpiandraiki-draharaha amerikanina, Stephanie Arnold, ho an’i Madagasikara, tao amin’ny seranan-tsambon’i Toliara omaly ny fanampiana ara-tsakafo azo tamin’ny famatsiam-bolan’ny governementa amerikana. Natolotra avy hatrany ny Pam izany satria izy ireo no hiandraikitra ny fitsinjarana azy avy hatrany.
Ity fanampiana ara-tsakafo ity dia hanampy mivantana olona manodidina ny 300 000 toy ny zaza madinika sy ny reny tandindomin-doza amin’ny tsy fanjarian-tsakafo.
Ampahany voalohany amin’ny fanampiana vonjy aina mitentina 49 000 000 000 Ariary na 11 650 000 dolara amerikanina avy amin’i Etazonia io natolotra omaly io. Olona maherin’ny 560 000 mila fanampiana manerana ny faritra atsimo sy atsimo andrefan’i Madagasikara no hisitraka izany.
Efa an-dalana miainga avy eny amin’ny seranan-tsambo mankany amin’ireo vondrom-piarahamonina tena mila izany ireo fanampiana ara-tsakafo amerikanina ireo.
Ny fanampiana ivelany ataon’i Etazonia dia vonjimaika sy efa voafaritra ho an’ireo tena mila azy ary hentitra ny fanaraha-maso izany hiantohana ny tamberin’andraikitra amin’ny mpandoa hetra amerikanina.
Manampy an’i Madagasikara androany ity fanampiana vonjy aina ity, ary ny fanampiana avy amin’i Etazonia dia mikendry ny hanohana azy ho lasa firenena mahavita tena sy tsy miankin-doha amin’ny fanampiana avy any ivelany.
Entina hanohanana ireo faritra manan-danja hisoroka ny tsy fahampian-tsakafo rahateo ny tohana tahaka izao. Fanohanana an’i Madagasikara hiroso amin’ny fahavitan-tena bebe kokoa. Ny fanampiana vonjimaika dia miantefa amin’ireo tena mila azy any amin’ireo faritra tena voa mafy noho ny hain-tany, izay ahitana olona ana hetsiny maro miatrika tsy fahampian-tsakafo mahery vaika.
Tatiana A
French