Nitrangana lozam-pifamoivoizana namoizana aina indray tany amin’ny lalam-pirenena faharoa iny, afakomaly tamin’ny 11 ora atoandro. Niseho teo amin’ny amin’ny toerana antsoina hoe : Andriaka, tsy lavitra an’Anjiro, distrikan’i Moramanga ny loza. Moto iray notaingan’olon-droa no nidona mafy tamin’ny kamiao mpitatitra entana iray teny an-toerana. Avy aty Antananarivo hihazo an’i Moramanga ilay fiara be. Raha nifanohitra tamin’izany ilay kodiaran-droa. Mafy ny fifandonana teo amin’ny roa tonta ka maty tsy tra-drano, ireo olona roa teny ambony moto. Izay nahitana raim-pianakaviana, iray, 29 taona, sy ny zanany lahikely vao efa-taona monja.
Raha ny fanazavana voaray, namono tena ilay raim-pianakaviana ary noentina niaraka taminy ny zanany. Tsy nanao aroloha izy nefa nirimorimo mafy teny an-dalana. Nadonany tamin’ilay fiara ny moto noentiny. Efa niezaka niala izany ny mpamilin’ilay fiara fa tsy afaka ka nidona tao, raha ny fanazavana nataon’ireo nanatri-maso.
Fantatra fa nisy disadisa ary niafara tamin’ny fisarahana teo amin’ilay raim-pianakaviana sy ny vadiny talohan’io tranga, raha ny fanazavana voaray avy amin’ny manam-pahefana. Efa niakatra teny amin’ny fitsarana ny raharaha ary nahazo rariny hitaiza ny zanaka naterak’izy ireo ilay vehivavy. Tezitra mafy noho izany, ity lehilahy ity ka ho vonoiny miaraka aminy ilay zaza satria mahatonga ny ady lava eo amin’izy mivady. Nanoratra taratasy rahateo izy milaza fa “androany no ahitanareo ahy farany”. Lasa nirifatra tamin’ny moto izy ireo ary izao maty izao.
Tonga teny an-toerana nitrangan’ny loza, ny polisim-pirenena avy ao Moramnaga sy ny misahana ny lozam-pifamoivoizana. Notazomina natao andrimaso ao amin’ny BPR Moramanga ny mpamilin’ny fiarabe nahavanon-doza.
Mino
French