Hanampy betsaka ny mponina any Atsimo ny tetikasa Baobao Network, izay vatsian’ny amerikanina vola. Maherin’ny 30 000 ireo olona hisitraka rano madio fisotro amin’izany.
Manova tanteraka ny fiainana andavanandron’ny mponina ao Tsihombe ny tetikasa vaovao “Baobab Network”. Amin’izao fotoana, afaka mantsaka rano madio ao an-tanànany ihany ireo fianakaviana, amin’ny sarany 700 Ar isaky ny daba.
Io sarany mirary io no hiantohana ny fampandehanana sy ny fikojakojana ny fotodrafitrasa famatsian-drano mba hateza. Mitaky fikolokoloana ny fotodrafitrasa mba haharitra ary mila ny fiarovan’ ny mponina ny fampaharetana izany. Vokatry ny fanohanan’i Etazonia, ny Unicef Madagascar sy ny Tatidrano social entreprise no nahafahana nanao ny tetikasa.
Teo aloha, tsy maintsy nanao dia an-tongotra mandritra ny ora maro ny mponina, ary nandoa 4 000 Ar vao nahazo rano iray daba 20 litatra. Mitentina 7 800 tapitrisa Ar ny fanampiana amerikanina hanitarana ireo tetikasa momba ny rano sy ny fidiovana (Wash).
Mponina maherin’ny 30 000 izay tena sahirana ara-pivelomana no hisitraka izany.
Olona maherin’ny iray tapitrisa, any atsimon’ny Nosy, no miaina anaty tsy fanjarian-tsakafo sy tsy fahampiana rano madio. Manomboka mivaha amin’ny ampahany izany olana izany amin’izao fampandehanana ny tetikasa “Baobab Network” izao.
Amin’ny alalan’ny fanohanana ireo tetikasa mamaha olana, tarihin’ny fitondrana eto Madagasikara sy ireo orinasa ao an-toerana, manampy ireo vondrom-piarahamonina hanorina fotodrafitrasa sy rafitra ilainy ho amin’ny fahavitan-tenany maharitra i Etazonia. Mikendry ny hampihenana ny fiankinandohan’i Madagasikara amin’ny fanampiana ivelany sy hananany mpiara-miombon’antoka matanjaka koa no tanjona.
Tatiana A
French