Voasambotry ny fokonolona, nofatorana ary efa natao tao anaty kodiarana sy mololo, ny lehilahy iray tratra nangalatra tao amin’ny faritry ny Oniversite Toliara, omaly maraina. Leo hala-boty sy asa ratsin’ireo mpangalatra, tsy namelan’izy ireo io lehilahy sarona teo am-panaovana ny asa ratsiny io raha tsy voasambotra. Tsy nisy alaharo, nentin’ny hafanam-po ny ankamaroan’ireo nahasambotra azy. Nanita-kevitra handoro velona tamin’ny alalan’ny kodiarana. Naharay ny loharanom-baovao ara-potoana anefa ny mpitandro filaminana. Nigadona tao amin’ny toerana voalaza ka niditra an-tsehatra tamin’ny fandaminana ny tranga. Natsahatra ny fikasan-dratsin’ny fokonolona hanao fitsaram-bahoaka. Nentina hatao famotorana io lehilahy io ary hampiharina aminy ny lalàna. Manentana ny olom-pirenena sy ny fokonolona hatrany ny mpitandro filaminana mba tsy hanao fitsaram-bahoaka. Entanina hitondra ny olona voarohirohy eny anatrehan’ny manam-pahefana mba hanaovana ny fanadihadiana sy ny famotorana rehetra, hisorohana ny mety ho vono olona sy hipotran’ny marina.
Tsiferana R.
French