Nandritra ny Andro iraisam-pirenena ho an’ireo olona mivadi-tongotra (pied-bot), omaly, no nampahafantarana fa misy ny fitsaboana “Ponseti” azo atao amin’izy ireny dieny mbola kely. Efa maherin’ny 4 000 ireo ankizy nisitraka izany fitsaboana izany teto Madagasikara. Ary raha vantany vao teraka ny zaza dia afaka atomboka sahady ny fitsaboana, na dia telo andro monja aorian’ny fahaterahana aza.
Ny mivadi-tongotra dia fahasembanana eo amin’ny tongotry ny zaza miseho hatrany am-bohoka. Raha tsy voatsabo ara-potoana izy io dia mety hitarika fahasembanana maharitra ka hanasarotra ny fivezivezen’ny ankizy eo amin’ny fiainany andavanandro. Tombanana ho 1 ka hatramin’ny 2 amin’ny zaza 1 000 teraka velona no ahitana ity trangan’aretina fahasembanana ity. “Hetsika mialoha ho an’ny ankizy tsirairay: fitiliana, fitsaboana ary fanaraha-maso ny mivadi-tongotra eto Madagasikara.” Io ny lohahevitra novoizina nandritra ny fanamarihana.
Misy ny hetsika fanentanana sy fitiliana manerana ireo Faritra 24 eto Madagasikara mba hahafahana mamantatra sy manampy ireo ankizy voakasik’ity fahasembanana ity.
Tatiana A
French