Maty voatifitry ny polisin’ny UIR teny Ambatomaro, ny sabotsy alina tamin’ny 9 ora, ny roa tamin’ireo jiolahy enina voasambotra dia i Capsat sy i Feno. Nanohitra ireo polisy izy roa lahy tamin’io fotoana io.
Raikitra ny fifanjevoana teo amin’ny polisin’ny UIR sy ny andian-jiolahy tarihin’i Capsat, 23 taona, teny Ambatomaro, ny sabotsy alina teo. Jiolahy ikoizana sy mpampihorohoro ary mpanao fanafihana mitam-piadiana teto an-drenivohitra ry zalahy ireto. Araka ny fampitam-baovao voaray avy amin’ny polisy, nisy ny fitarainana sy fanangonan-tsonia nataon’ireo mponina eny Ambatomaro momba ny asa ratsy sy ny fanakorontanana ataon’ireto jiolahy ireto. Nahazo loharanom-baovao rahateo ny polisy ny sabotsy teo fa manomana fanafihana mitam-piadiana ao amina bar iray ao Ambatomaro i Capsat sy ireo namany dimy. Nidina haingana teny an-toerana ny polisin’ny UIR avy ao amin’ny kaomisaria foibe. Nametraka ny vela-pandrika rehetra izy ireo mba hanatanterahana ny fisamborana ireo jiolahy izay tsy nanampo na inona na inona tamin’io fotoana io. Voamarina tokoa ny fisian’ireo jiolahy tarihin’i Capsat tao amin’io trano fisotroana io. Niroso tamin’ny fisamborana azy ireo ny polisy ka azo sambo-belona izy enin- dahy. Nisy ny fanadihadiana savaranonando nataon’ny polisy ka nolazain’i Capsat sy i Feno fa any amin’ny jiolahy iray fantatra amin’ny anarana hoe : Bolo no misy ny fitaovam- piadiana fampiasan’izy ireo.
Jiolahy efa nigadra teny Tsiafahy
Nentin’ny polisy nihazo ny trano fonenan’i Bolo ireto jiolahy ireto, kanjo nikasa haka an-keriny ny fitaovam-piadiana teny amin’ny polisy izy roa lahy ka voatifitra avy hatrany. Vokany, maty tsy tra-drano i Capsat sy i Feno. Voalazan’ny tatitra avy amin’ny polisy hatrany fa efa nigadra teny amin’ny fonjaben’i Tsiafahy i Capsat, saingy niverina nanohy ny asa ratsiny indray taorian’ny fivoahany ny fonja. Ahitana diam-bala eo amin’ny tehezany an-kavanana, marika ahafantarana azy nandritra ny fifandonana tamin’ny polisin’ny Boriborintany fahatelo. Nentina anaovana fanadihadiana ao amin’ny Polisy Sut kosa ireo efa-dahy naman’izy roa lahy voatifitra. Andrasana ny tohin’ity raharaha ity.
Jean Claude
French