Nanatanteraka atrikasa tany Fianarantsoa ny solombavambahoaka mpikambana ao amin’ny «Coalition parlementaire pour la vaccination» notarihan’ny filohan’ny Vaomieran’ny fahasalamam-bahoaka sy ny fandrindram-piterahana, Dr Rajaobelina Lova Herizo. Adisisika momba ny fampandehanana ny «Fonds national pour la vaccination» mba ho tena rafitra iray afaka ampiasaina hanamora ny fividianana vaksiny eto Madagasikara no nodinihina nandritra izany. Hoentina eny anivon’ny governemanta ny fehin-kevitra tapaka, hanaovana laharam-pahamehana ny fandraisana anjaran’ny fanjakana amin’ny fividianana vaksiny. Anisan’ ny niatrika izany ny solontenan’ny minisiteran’ny Fahasalamana, ny Fitsarana, ny Toekarena sy ny fitantanam-bola ary ny mpiara-miombon’antoka, toy ny Unicef, OMS ary ny firaisamonim-pirenena Hina.
Dr Rasoamanana Radoniaina Andriantsiresy, mpampianatra mpikaroka, avy amin’ny ESPA, sady talen’ny Rafitra ara-informatika sy ny teknolojia vaovao eo amin’ny Mesupres, no nahazo niaraka tamin’ny ekipa nisy azy ny loka voalohany tamin’ny «Hackathon DIU E-Santé 2026», natao tany Abidjan, Côte d’Ivoire. Nahazo izany loka izany izy ireo noho ny famoronana vahaolana ara-teknolojia maranin-tsaina hanatsarana ny fanaraha-maso ny fitondrana vohoka sy ny fahasalaman’ny reny sy ny zaza. Manampy amin’ny fisorohana mialoha ny loza mety hitranga sy ny fanatsarana ny fikarakarana ara-pahasalamana ny voka-pikarohana natao.
French