Fivoriana tsy ara-potoana : Hajoro ny vaomiera hanadihady an-dRajoelina Andry

Hiroso amin’ny fivoriana tsy ara-potoana ny eo anivon’ny Antenimierampirenena. Anisan’ny mety hodinihina ny fitoriana ireo mpitondra ambony.

Nivoaka tamin’ny filankevitry ny minisitra, tamin’ity herinandro ity, ny fanaikana ity Andrimpanja­kana ity hivory tsy ara-potoana. Nambaran’ny loharanom-baovao iray eny Tsimbazaza fa anisan’ny lahadinika amin’ny fivoriana, raha tsy misy ny fiovana, ny momba ny fitoriana mpitondra ambony. « Anisan’­ izany ny momba ny filoha teo aloha, Rajoelina Andry. Ha­tsangana amin’izao fivoriana tsy ara-potoana izao ny vaomiera manokana hanadihady momba izany », hoy ny loharanom-baovao. Mifototra amin’ireo fitoriana nataon’ny fikambanan’ny tanora Gen Z ny fiampangana sy ny fanenjehana ity filoha teo aloha ity eny anivon’ny Antenimierampi­renena. Anisan’ny vesatra iampangana azy amin’izany, araka ny fitoriana, ny famadihana tanindrazana. Eo koa ny fisandohana andraikitra tamin’ny fahefana teo an-tanany ka nahatonga ireny fepetra samihafa noraisiny tamin’izany, indrindra manoloana ny hetsika sy fidinana an-dalambe ny septambra sy oktobra, ny taona 2025. Maromaro ny fandikan-dalàna sy fanitsakitsahana ny Lalàmpanorenana miverimberina tamin’ny fotoam-pitondran’ny filoha teo aloha, araka ny fitorian’ny Gen Z hatrany.

Vazaha!
Etsy andaniny, mbola niampy fisandohana andraikitra ny vesatra. Anisan’ny voakasika ny tsy fizakany intsony ny zom-pirenena malagasy. Manampy ireo ny herisetra sy ny fihetsiky ny mpitandro filaminana nanoherana ary nandravana ny hetsika notarihin’ny tanora manerana ny Nosy.
Araka izany, miandry ny fivoriana tsy ara-potoana ny momba io raharaha hanenjehana ny filoha teo aloha, Rajoelina Andry, io. Miankina amin’ny didim-panjakana avy amin’ny governemanta ny datin’ny fivoriana sy ny ho lahadinika amin’izany.

Synèse R.

Araka ny vaovao farany voaray, tsy raikitra ny fivoriana tsy ara-potoan’ny depiote. Mbola hifantoka amin’ny fandraisana ny fihaonana miaraka amin’ny iraka manokanan’ny SADC ny tomponandraikitra isan’­ ambaratongany. Aorian’izay vao hiara-kidinika ao Tsim­bazaza ny solombavambahoaka.