Nafana ny fifaninanana “Absolute” nandritra ny “Grand Open Mada IV”, natao teny Mahamasina, ny faran’ny herinandro teo. Rakotomaria Tsinjo no nahazo ny ” Cash prize”.
Tontosa teny amin’ny Lapan’ny fanatanjahantena Mahamasina, tao amin’ny Petit Palais, ny fifaninanana “Grand Open Mada IV”, taranja Jiujitsu Breziliana. Anisan’ny nampisongadina ity fifaninanana ity, ny fisian’ny “Absoulte”, ka Rakotomaria Tsinjo, avy amin’ny klioban’ny One Tribe no nahazo ny fandresena sy ny “Cash prize” tamin’izany. Nisongadina indrindra kosa ny klioban’ny Checkmat, tamin’ny vokatra ankapobeny, izay nandrombaka medaly volamena 7. Laharana faharoa manaraka azy, ny klioban’ny Guerreros, nahazo medaly volamena 6. Niakatra ny lentan’ny mpikatroka ary nivoatra ny fifaninanana, araka ny nambaran’ny filoha mpanorina ny Combat Club 101 Jiujitsu, Ranarivelo Xavier, izay klioba nikarakara ity “Grand Open Mada IV” ity. Nisy ihany koa ny fiaraha-miasan’ny klioba tamin’ny ligin’ Analamanga ny Jiujitsu Breziliana sy ny taranja échecs izay nanao fampirantiana teny an-toerana. Ankoatra ny “cash prize”, nahafahana nijery izay mendrika sy afaka miatrika fifaninanana iraisam-pirenena ihany koa ity GOM IV ity. Tsiahivina, mpikatroka jiujitsu breziliana 140 manerana ny Nosy avy amin’ny klioba 13 no nandray anjara nandritra ny fifaninanana. Hiditra amin’ny fanomanana ny andiany faha-5 sahady ny Combat Club 101 Jiujitsu vao vita ity andiany faha-4 ity, raha ny fanazavan’ny filoha mpanorina ny klioba hatrany. Mankalaza ny faha-5 taona nitsanganan’ny klioba ihany koa izy ireo amin’ity taona ity.
Mi.Raz
French