Tapaka tamin’ny fivorian’ ny biraon’ny Sendikàn’ny mpirakidraharaha eto Madagasikara (SGM), teny Anosy, afakomaly, fa hahemotra ny fivoriamben’ny mpirakidraharaha rahampitso. Saika hodinihina amin’izany ny fanohizana ny fitokonana noho ny tsy fanatanterahan’ny minisiteran’ny Fitsarana ny fitakin’izy ireo. Anton’ny fanafoanana ny fivoriambe ny fanendrena ny minisitry ny Fitsarana vaovao.
“Mihemotra ny fivoriambe, fa aleo aloha mifampidinika. Vaovao ny mpitantana, ka hisy fifampidinihana vaovao”, hoy ny filohan’ny SGM, Randriamaharo Alain Michel, ny amin’izany. Misokatra hatrany amin’ny dinika sy fifampiresahana ny sendikà ny amin’ ny fitakian’izy ireo. Nisy fihaonana imbalo tamin’ny minisitra taloha. Angatahin-dry zareo amin’izao ny hiverenan’ny fifampidinihana.
Fifaliana ho an’ny mpirakidraharaha ny fanapahan-kevitry ny fitondrana. Ny fitsarana no tokony ho rehareha sy aroriaka ny hoe fanjakana tan-dalàna. “Nandritra ny fitokonanay, maro ny fanapahan-kevitra tsy ara-dalàna sy jadona nataon’iny minisitry ny Fitsarana nesorina iny”, hoy izy. Nanaporofoina izany fa izy no tompon’ny fitsarana. Mampalahelo na ny fanoharana ny mpirakidraharaha amin’ ny mpiasa an-trano aza.
Taratasy nifanaovan’ny minisitra roa no nahatapaka karama, tsy nandalo dingana sy fomba ara-dalàna. Tsy didim-pitondrana izany, tsy fanapahana, tsy inona. Nahazo minisitra vaovao ny Fitsarana. Rivo-baovao ho an’ny fitsarana manontolo izany, fa tsy ho an’ny mpirakidraharaha irery.
R. Nd.
French