Lozam-pifamoivoizana teto an-dRenivohitra : Olona telo namoy ny ainy, ny sabotsy teo

Ny sabotsy teo, olona telo namoy ny ainy, vokatry ny lozam-pifamoivoizana teto an-dRenivohitra sy ny manodidina. Maty voahitsaky ny kamiao ny mpitondra moto iray tetsy Anosizato Andrefana. Maty tery tao anaty fiara izay nifandona tetsy Ankadindramamy, ny roa hafa.

Mateti-piseho ny trangana lozam-pifamoivoizana namoizana ain’olona tato ho ato. Lehilahy sy renim-pianakaviana namoy ny ainy, nandritra ny fifandonan’ ny fiara miisa roa, tetsy Anka­dindramamy, afakomaly tamin’ ny 5 ora sy sasany maraina. Niseho tsy lavitra ny tobin-tsolika Total, ny loza. Noho ny ha­mafin’ny fifandonana, lehilahy iray izay nitondra ny fiara Peugeot 106 no maty tsy tra-drano. Tery tao anatin’ny fiara izy io, raha ny fanazavana voaray tamin’ny mpitandro filaminana tonga teny an-toerana. Ankoatra izay, vehivavy bevohoka tao anaty fiara, izay nipetraka teo amin’ny seza aloha ihany koa no tsy nahatsiaro tena. Nen­tina haingana nnamonjy hopitaly izy taorian’ny loza, saingy tsy tana koa ny ainy, raha ny fanazavana voaray hatrany.
Tsiahivina fa fiara Kia Sorento avy any Ampasapito, hiakatra ho any Mahazo no nihavian’ny loza, raha ny fa­nazavan’ireo olona nanatri-maso ny tranga. Nandeha mafy io fiara io ary nangalatra ny ankavian-dalany. Nandritra izany izy no nifaoka fiara Peu­geot nifanena taminy, izay nidina avy any Mahazo. Noho ny hamafin’ny dona, tafaho­dina tanteraka ny fiara voa­dona ary pempo tanteraka ny lohan’ilay fiara lasibatra.

Nahenoana fofon’alikaola
Nahenoana fofon’alikaola ny mpamilin’ilay fiara Sorento nihavian’ny loza, raha ny fanazavana voaray tamin’ireo olo­na nanatri-maso ny zava-ni­tra­nga. Tonga teny an-toe­rana nanao ny fanadihadiana sy nijery ny zava-nisy ny polisim-pirenena misahana ny lozam-pifamoivoizana. Tao­rian’ny loza, notanana natao andrimaso ny mpamilin’ilay fiara Kia. Efa misokatra ny fana­dihadiana ataon’ny mpitandro filaminana mahakasika ity raha­raha ity. Antony iray ma­ha­tonga ny lozam-pifamoivoizana tahaka izao ny fandehanana mafy sy ny fandrai­sana zava-pisotro misy ali­kaola. Entanina, araka izany, ny mpamily rehetra mba ha­naja ny lalàna mifehy ny fifamoivoizana, hisorohana ny loza tahaka izao.

Mino