Marary 15 hisitraka vanin-taolana artifisialy ao amin’ny CHUJRA. Mahatratra 12 tapitrisa Ar ny vidin’ny “prothèse” iray. Misy manampahaizana avy any Brest miara-misalahy amin’ny Profesora malagasy hanao ny fandidiana na ilay antsoina hoe: “arthoplastie”.
Saropady ny aretin’ny vanin-taolana. Lafo dia lafo ny fanoloana azy ho artifisialy ho an’ireo tsy maintsy mila izany. Mitondra tolo-tanana ho an’ny marary 15 ny ekipan’ny manampahaizana iray avy any ivelany, tarihin’ny profesora Dubrana, sy ny Orthopédie sans frontière. “Mitentina hatrany amin’ny
12 tapitrisa Ar ny vidin’ny prothèse ho an’ny vanin-taolana misy fahavoazana”, hoy ny fanazavan’ny profesora Razafimahandry Jean Claude, manampahaizana momba ny fitsaboana ny aretin’ny taolana sy ny vanin-taolana ao amin’ny hopitaly CHUJRA. Efa nisy marary valo vita fandidiana sy fanoloana, hatreto. Mitohy ny fikarakarana sy fandraisana an-tanana ireo marary efa voafantina hisitraka izany.
Ny arthroplastie dia mety hatao amin’ny valahana na lohalika na soroka sy ireo tonon-taolana hafa. Tsy voatery hosoloina prothèse foana izany fa misy karazana arthroplastie manamboatra na manova ny firafitry ny vanintaolana fotsiny. Fametrahana tonon-taolana artifisialy, mety ho vy, plastika manokana na fitaovana hafa no hatao amin’ izany.
Efa hatramin’ny taona 2013 ny fiaraha-miasan’ny hopitaly sy ireo ekipa avy any ivelany. Andiany faha-14 no tanterahina ankehitriny. Nahatratra 180 ny prothèse efa napetraka maimaimpoana niarahana tamin’ny ekipa.
Manana ny profesora manam-pahaizana momba ny vanin-taolana isika eto Madagasikara. Tsy tokony ho variana amin’ny otra sy ny ody fanaintainana fotsiny rehefa misy tsy fahasalamana fa manatona azy ireny.
Tatiana A
French