Nidina ifotony nitondra fanampiana ho an’ny any Nosy Varika noho ny rivodoza Freddy farany teo ny filoha Rajoelina Andry.
Nivoitra tamin’ny lahateniny fa tsy maintsy tonga tany an-toerana ny tenany. “Tsy mifanary isika. Toy ny vary sy rano ka tsy manaiky hosarahina. Tsy maintsy lasa lavitra rehefa miara-dalana ary tsy ho voasakan’iza na iza”, hoy izy tany an-toerana. Nambarany fa harenina ao anatin’ny fotoana fohy ireo fotodrafitrasa simba. Anisan’izany ny fiangonana, ny biraom-panjakana sy ny sekoly…
Nanteriny fa tsy ho hadino i Nosy Varika ary tsy maintsy mandroso. Nanamarika izany ny asa, nataon’ny fitondram-panjakana, toy ny EPP, mahazaka mpianatra 600. Tsy mbola nisy mpitondra nanao an’izany teto hatramin’izay, araka ny nambarany. Efa vita koa ny birao vaovao an’ny polisy ary alefa daholo ny fitaovana rehetra ka hotokanana tsy ho ela izany.
Nanolotra “Ambulance” hary fomba sy vaovao misy “Oxygène” koa ny filoha. Nanome toky ny filoha fa hanamboatra fotodrafitrasa ho an’ny rano fisotro. Ho avy mialoha izany ny kamiaô hanao “Forage” maromaro ahafahan’i Nosy Varika misitraka rano fisotro avy hatrany. “Tsy maintsy mifampiantso sy miara-misalahy ary miara-mientana isika”, hoy ihany izy. Natsidiny fa efa nandeha ny fanadihadiana samihafa ka tsy maintsy hafainganina ny fanamboarana ny Lalam-pirenana faha-11 (RN 11) . Ho avy tsy ho ela koa ny fanamboarana CSB II sy ireo mpitsabo maromaro “Caravane médicale”. Atao ao ny fitsaboana maimaim-poana ny aretina rehetra toa ny fanaovana fitiliana toy ny diabète… Notoloran’ny filoha fanomezana koa ireo raiamandreny, ampanjaka noho ny fandehanana dia an-tongotra avy lavitra namonjy an’i Nosy Varika.
Hiofana ireo vehivavy
Momba ny fankalazana ny 8 marsa kosa, nambarany nanasa ireo vehivavy any an-toerana ny vadin’ny filoha hanatrika ny fihaonana nasionaly aty Antananarivo. “Omena fiofanana ianareo mba ahafahanareo miatrika velon-tena… Hovatsiana fitaovana koa ianareo”, hoy ihany izy.
Etsy andaniny, hizarana masomboly sy fitaovana ny any an-toerana. Hisitraka fanomezana koa ireo tokantrano marefo. “Tsy maintsy homena karine manara-penitra misy “QR code” isaky ny fianakaviana. Hozaraina isan-tokatrano izany ahafahana manaraka ny fanampiana. Ny tanàn-dehibe ihany no voatokana hahazo ny karine misy QR code. Tsy maintsy tonga any amin’ny isan-tokatrano ny fanomezana avy aty amiko”, hoy ny filoha.
Nambarany nanoloana ireo ben’ny Tanàna fa efa tonga ny moto ahafahana mikarakara ny vahoaka. Nambarany fa hojerena ny fanamboarana ny baka ary horaisina an-tanana miaraka amin’ny fotodrafitrasa hafa tokony hatao sy tsy maintsy tanterahana izany.
Namintinan’ny filoha izany ny nilazany fa tsy maintsy hanampy ny vehivavy, ny tantsaha ary hanampy ireo madinika indrindra ny ankohonana sahirana sy ny tanora ny tenany.
Nanao “Asa tagnamaro” tamin’ny fanarenana ny sekoly ny filoha Rajoelina avy eo ary nizara sakafo sy koba aina ho an’ireo traboina sy ny ankizy any an-toerana.
Synèse R.
French