Niiba hatrany amin’ny 10,3% ny vola azo tamin’ny fanondranan’entana, ho an’ireo orinasa afakaba, nandritra ny telo volana fahatelo ny taona 2026.
Nivoitra izany tao anatin’ny tatitra navoakan’ny’ny Banky foiben’i Madagasikara. Asongadiny ao anatin’ny fanadihadiana ara-toekarena fa nihena ny entana naondrantsika tany ivelany na dia niakatra ny vidiny teo amin’ny tsena iraisam-pirenena. Nahatratra 42 627,8 taonina (t) ny vokatra naondrantsika nandritra io vanim-potoana io raha toa ka 50 373,2 t izany nandritra ny telo volana fahatelo ny taona 2025. Izany hoe, nihena 15,4% ny taha-panondranana nataon’i Madagasikara. Tsy nahatohitra izany koa ny fiakaran’ny vidiny, izay nisondrotra 6%. Lasa 12 340,1 dolara izany raha toa ka 11 636,6 dolara teo aloha. Vokany, nisanda 526 tapitrisa dolara ny vola azo tamin’ny fanondranana nandritra ny telo volana fahatelon’ny taona raha toa ka 586,2 tapitrisa dolara izany tamin’ny taon-dasa.
Sehatra
Voakasik’io fihenana io ny sehatry ny lamba, izay anisan’ny vokatra fanondran’ireo orinasa afakaba. Mahatratra 19,4% ny fihenana. Ankilany, niantraika betsaka tamin’ny sehatra ihany ny fihenan’ny tinady any ivelany, indrindra ny tsena amerikanina. Nampanalasala ireo mpanafatra entana ny rafitry “African Growth and Opportunity Act” (AGOA) tamin’ny taona 2025. Nihena araka izany ny tsenan’ireo orinasa afakaba.
Henintsoa
French